पुणे : ‘‘वैदिक काळापासून भारताने प्रगतीचे अतिउच्च शिखर गाठल्याचे दाखले आपल्याला दिसून येतात. आपली समृद्ध परंपरा, अध्यात्म, संस्कृतीचा परामर्श घेत भारताने विश्वगुरूच्या भूमिकेतून जगाचे नेतृत्व करावे. अध्यात्म आणि विज्ञान हे एकत्र आले पाहिजे ही वैदिक काळापासूनची धारणा वास्तवात आल्यास भारताचे नेतृत्व जगाला मान्य करावेच लागेल.’’ असे मत ज्येष्ठ संगणक तज्ज्ञ पद्मविभूषण डॉ. विजय भटकर(dr. vijay bhatkar) यांनी व्यक्त केले.

नॉन रेसिडेंट इंडियन पॅरेंटस् ऑर्गनायझेशन अर्थात ‘नृपो’ संस्थेतर्फे डॉ. भटकर यांना नृपो संस्थेचे सन्माननीय सदस्यत्व प्रदान करण्यात आले. त्यावेळी ते बोलत होते. या प्रसंगी व्यासपीठावर नृपोचे अध्यक्ष सुरेश कानगो, उपाध्यक्ष सुरेश नातू, सचिव सुभाष कुलकर्णी आणि राजेंद्र माहुलकर आदी मान्यवर उपस्थित होते.

यावेळी डॉ. भटकर म्हणाले, ‘‘एक काळ होता जेव्हा भारतीय शिक्षण व्यवस्थेतून निर्माण होणारी बौद्धिक पिढी ‘ब्रेन ड्रेन’च्या माध्यमातून पाश्चात्यांच्या प्रगतीत गुंतली होती. परंतु आता माहिती तंत्रज्ञानाच्या प्रगतीमुळे ‘ब्रेन गेन’पर्यंत आपला प्रवास झाला आहे. स्टार्टअपच्या क्षेत्रात आज भारतात सर्वाधिक प्रयोग होत आहेत. त्याचबरोबर डिजिटल इकॉनॉमी प्रत्यक्षात आणून दाखवली आहे. कोणताही आविष्कार किंवा शोधापेक्षा नव कल्पनेची शक्ती अधिक असते. देशात झालेल्या डिजिटल क्रांतीमुळे शाळेपर्यंत विद्यार्थी पोहोचू शकत नसले, तरी विद्यार्थ्यांपर्यंत शाळा पोहचत आहे. त्यामुळे अतिशय गतीने परिवर्तन आणि स्थित्यंतर घडून येत आहे. या परिवर्तनामुळे भारताचे आर्यावत भारत, अखंडित भारत हे स्वप्न पूर्ण होईल.’’कार्यक्रमाचे सूत्रसंचालन सचिव सुभाष कुलकर्णी यांनी केले तर, सुरेश नातू यांनी आभार मानले. त्यानंतर नृपोच्या सदस्य आसावरी असेकर यांच्या सुगमगीत गायनाची मैफल झाली.