पुणे : देशाच्या स्वातंत्र्याची ७५ वर्षे साजरी करण्यासाठी केंद्र सरकारने ‘आजादी का अमृत महोत्सव’ (azadi ka amrit mahotsav festival) कार्यक्रमांची मालिका आयोजित केली आहे. याचाच एक भाग म्हणून लोणावळा (lonavla) येथील आयएनएस शिवाजी येथे सोमवारपासून (ता. ९) विविध कार्यक्रमांचे आयोजन करण्यात आले आहे. (Ins shivaji start festival freedom day india)

यानिमित्त सोमवारी नौदलाचे जवान व त्यांच्या कुटुंबीयांसाठी व्याख्यान आणि सादरीकरणाचे आयोजन केले होते. यामध्ये भारताच्या स्वातंत्र्यासाठी महत्त्वपूर्ण ठरलेल्या ‘भारत छोडो चळवळीवर’ विशेष भर देण्यात आला. तसेच ‘आयएनएस शिवाजी’चे प्रमुख कमांडर अरविंद रावल यांच्या प्रमुख उपस्थितीत प्रशिक्षण संस्थेच्या मुख्य प्रवेशद्वारांना छत्रपती शिवाजी महाराज आणि कान्होजी आंग्रे यांची नावे देण्यात आली.

‘आझादी का अमृत महोत्सव’ हा उपक्रम १५ ऑगस्टपर्यंत सुरु राहणार आहे. हा उपक्रम भारताच्या सामाजिक, आर्थिक व राजकीय अस्मितेबद्दल माहिती देणारा आहे. या अनुषंगाने संस्थेमार्फत शालेय विद्यार्थ्यांना देशाच्या स्वातंत्र्य लढ्याचे महत्त्व पटवून देण्यासाठी व ‘आत्मनिर्भर भारत’च्या दिशेने त्यांना प्रोत्साहित करण्यासाठी मार्गदर्शन कार्यक्रम ठेवण्यात आले आहेत.