भाजपचे पुणे शहर अध्यक्ष जगदीश मुळीक यांचा काल वाढदिवस होता. त्यानिमित्ताने मुळीक यांच्या कार्यकर्त्यांनी त्यांना शुभेच्छा देण्यासाठी पुणे शहरात ठिकठिकाणी लावण्यात आले होते. या बॅनर्सवर मुळीक यांचा उल्लेख भावी खासदार असा उल्लेख करण्यात आला होता. त्यावरून राष्ट्रवादीचे नेते जितेंद्र आव्हाड यांनी मुळीक यांच्यावर जोरदार टीका केली होती.

या बॅनर वरून राष्ट्रवादीचे आमदार जितेंद्र आव्हाड यांनी टीका करत किती बेशरम असावं माणसांनी असं म्हंटलं होतं. आव्हाड यांची टीका जगदीश मुळीक यांच्या चांगलीच जिव्हारी लागली असून त्यावर त्यांनी जोरदार प्रत्युत्तर दिलं आहे. मुळीक यांनी आव्हाड यांना औरंजेबत संबोधत प्रत्युत्तर दिलं आहे. तसेच वाढदिवसाचे कार्यक्रम रद्द केल्याचेही बॅनर्सही पोस्ट केले आहेत.

भाजपचे खासदार गिरीश बापट यांचं निधन होऊन तीन दिवसही झाले नाहीत तोच जगदीश मुळीक यांचा भावी खासदार उल्लेख करणारे बॅनर्स लागल्यामुळे त्यांच्यावर सर्व स्तरातून टीका करण्यात येऊ लागली आहे. विरोधी पक्षनेते अजित पवार, खासदार सुप्रिया सुळे आणि जितेंद्र आव्हाड यांनीही टीका केली आहे. त्यानंतर हे बॅनर्स हटवण्यात आले. आव्हाड यांची टीका जिव्हारी लागल्याने मुळीक यांनी जितेंद्र आव्हाड यांना ट्विटच्या माध्यमातून प्रत्युत्तर दिलं आहे.

ट्विटमध्ये त्यांनी म्हंटलं आहे की, "बरं झालं मुंब्र्याच्या औरंग्यानं गरळ ओकली. या हिंदुद्वेष्ट्याकडून संस्कार शिकण्याइतकी वाईट वेळ आमच्यावर आलेली नाही. फेकन्यूजवर पोसलेल्या या माणसानं फोटोची साधी खातरजमा करायचे कष्ट घेतले नाहीत! प्रसिद्धीसाठी देशद्रोही, महाराष्ट्रद्रोही बनणाऱ्या जितुद्दीनला आता जनतेनं पुरतं ओळखलं आहे, अशी खोचक टीका जगदीश मुळीक यांनी केली आहे.

जगदीश मुळीक यांनी पुण्यात लावलेलं एक बॅनर्स पोस्ट केलं आहे. त्यात त्यांनी कार्यकर्ते आणि जनतेला निवेदन केलं आहे. माझ्या वाढदिवसादिनी अर्थात 1 एप्रिल रोजी दरवर्षी आपण मला भरभरून शुभेच्छा देता, विविध समाजपयोगी उपक्रमाचे आयोजन करता आपल्या या सदिच्छा मला आजवर निश्चितच पाठबळ देत आल्या आहेत. त्याबद्दल आपले मनापासून धन्यवाद। या लोकनेते स्व. गिरीशभाऊ बापट यांच्या निधनामुळे 1 एप्रिल रोजी असणारा वाढदिवस साजरा न करण्याचा निर्णय घेतला असून सर्वांनी याची नोंद घ्यावी. वाढदिवसाचे सर्व कार्यक्रम आणि उपक्रम रद्द करण्यात आले आहेत, असं पोस्टरमध्ये जगदीश मुळीक यांनी म्हटलं आहे.