पुणे - पुणे जिल्हा सहकारी दूध उत्पादक संघाच्या (कात्रज डेअरी) (Katraj Dairy Election) पंचवार्षिक निवडणुकीच्या उमेदवारीसाठी (Candidate) सत्ताधारी राष्ट्रवादी कॉंग्रेसचे (NCP) बुजूर्ग संचालक पुन्हा एकदा कात्रज डेअरीच्या आखाड्यात उतरण्यासाठी तीव्र इच्छुक (Interested) आहेत. मावळत्या संचालक मंडळातील निम्म्याहून अधिक संचालकांनी राष्ट्रवादी कॉंग्रेसच्या पक्षश्रेष्ठींकडे तशी इच्छा व्यकत केली आहे. परंतु राष्ट्रवादी कॉंग्रेसने अद्याप या निवडणुकीसाठीचे पक्षाचे अधिकृत पॅनेल जाहीर केलेले नसल्याने या बुजुर्गांचे डोळे राष्ट्रवादी कॉंग्रेसच्या अधिकृत पॅनेलच्या घोषणेकडे लागले आहेत.

या बुजुर्गांना रोखून, त्यांच्याऐवजी नव्या चेहऱ्यांना संधी देता यावी, या उद्देशाने उमेदवारी अर्जांची छाननी होईपर्यंत पक्षाचे अधिकृत पॅनेल जाहीर न करण्याचा निर्णय राष्ट्रवादी कॉंग्रेसने घेतल्याचे या पक्षातील एका वरिष्ठ नेत्याने सांगितले. राष्ट्रवादी कॉंग्रेसच्या या पवित्र्यामुळे कात्रज डेअरीच्या संचालक मंडळात वर्षानुवर्षांपासून ठाण मांडून बसलेल्या बुजुर्ग संचालकांपैकी कोणा-कोणाचा पत्ता या निवडणुकीच्या आखाड्यातून कट होणार आणि कोणत्या नवीन चेहऱ्यांना पक्ष संधी देणार, याकडे जिल्ह्याचे लक्ष लागले आहे.

जिल्हा दूध संघाच्या निवडणुकीतील उमेदवारीसाठी खूप वेगळे निकष आहेत. त्यामुळे या निकषांत बसणाऱ्यांची संख्या तशी अन्य निवडणुकांच्या तुलनेत कमी असते. त्यामुळे दूध संघाच्या निवडणुकीत केव्हा कोणत्या उमेदवाराचा उमेदवारी अर्ज अवैध ठरले, हे सांगता येत नाही. त्यामुळे उमेदवारी अर्जांची छाननी होईपर्यंत राष्ट्रवादी कॉंग्रेस या निवडणुकीतील पक्षाच्या उमेदवारांचे अधिकृत पॅनेल जाहीर करणार नाही. उमेदवारी अर्जांची छाननी पूर्ण झाल्यानंतर निवडणूक चिन्ह वाटपाच्या दिवशी पॅनेल जाहीर केले जाणार असल्याचे राष्ट्रवादी कॉंग्रेसचे जिल्हाध्यक्ष प्रदीप गारटकर यांनी बुधवारी (ता.१६) सांगितले.

कात्रज डेअरीच्या निवडणुकीसाठी १४ फेब्रुवारीपासून उमेदवारी अर्ज भरण्यास सुरवात झाली आहे. बुधवारी अर्ज दाखल करण्याचा तिसरा दिवस होता. तरीही या तीन दिवसात विद्यमान संचालकांपैकी केवळ तीन जणांचे उमेदवारी अर्ज दाखल झालेले आहेत. यासाठी आणखी दोन दिवस उमेदवारी अर्ज दाखल करता येणार आहेत. गेल्या तीन दिवसात २२ जणांनी मिळून एकूण ३३ उमेदवारी अर्ज दाखल केले आहेत. या २२ जणांमध्ये माजी अध्यक्ष व विद्यमान संचालक बाळासाहेब खिलारी, माजी उपाध्यक्षा व संचालक केशरबाई पवार आणि संचालक भगवान पासलकर या तीनच संचालकांनी उमेदवारी अर्ज भरला आहे.

आतापर्यंत अडीचशे अर्जांची विक्री

दरम्यान, उमेदवारी अर्ज भरण्यास सुरवात झाल्यापासूनच्या तीन दिवसांत ८४ इच्छुकांनी एकूण २५० उमेदवारी अर्ज निवडणूक निर्णय अधिकारी मिलिंद सोबले यांच्याकडून घेतले आहेत. यापैकी आतापर्यंत केवळ ३३ उमेदवारी अर्ज दाखल केले आहेत. शिवाय आणखी दोन दिवस इच्छुकांना उमेदवारी अर्ज घेता येणार आहेत. यावरून कात्रज डेअरीच्या संचालक मंडळाच्या १६ जागांसाठी तीनशेहून अधिक जणांचे उमेदवारी अर्ज दाखल होण्याची शक्यता निवडणूक निर्णय अधिकारी कार्यालयाकडून व्यक्त करण्यात आली आहे.