कात्रज : गुजर-निंबाळकरवाडीसह कात्रज परिसरातील नवीन समाविष्ठ गावांना कोविड लसीकरणासाठी खेड-शिवापूर येथे जावे लागत होते. त्यामुळे नागरिकांना नाहक त्रास होत होता. याकरिता गुजर-निंबाळकरवाडी येथे शनिवारी आणि रविवारी दोन दिवसीय मोफत कोरोना लसीकरण कार्यक्रम राबविण्यात येत आहे.

अल्प उत्पन्नधारकांसाठी बाळासाहेब देवरस पॉलिक्लिनिक, सिरम इन्स्टिट्यूट व पीपीसीआर यांच्या संयुक्त विद्यमानाने तसेच ममता फाउंडेशन व अनंतकृपा क्लिनिक यांच्यामार्फत ही मोहिम राबविण्यात येत आहे.

आरोही प्लाझा बिल्डिंग, जय गणेश चौक, गुजर निंबाळकरवाडी रस्ता येथे शनिवारी या लसीकरण केंद्राचे उद्घाटन करण्यात आले. यावेळी राष्ट्रवादीचे नेते नमेश बाबर, भारती विद्यापीठचे वरिष्ठ पोलीस निरीक्षक जगन्नाथ कळसकर, गुजर-निंबाळकरवाडीचे सरपंच व्यंकोजी खोपडे, दिपक गुजर, गणेश निंबाळकर, गणेश काळे, सुनील मांगडे, अजित निंबाळकर, विक्रम भिलारे संदिप निंबाळकर आदी उपस्थित होते.