खेड-शिवापूर : पुणे सातारा रस्त्यावर खेड-शिवापूर टोलनाक्यावर शुक्रवारी पहाटे राजगड पोलिसांनी टेम्पोमधून वाहतूक करण्यात येणारा 14 लाख 17 हजार पाचशे रुपयांचा गुटखा जप्त केला. याप्रकरणी दोन जणांना ताब्यात घेतले असून त्यांच्यावर गुन्हा दाखल करण्यात आला आहे.

कानाराम मिश्रिलाल चौधरी (वय 32) आणि देवेंद्र गणपतलाल मेघवाल (वय 25, दोघेही रा. वडगाव, हवेली, पुणे. मूळ रा. मांडा, ता. मारवाड दक्षिण, जि. पाली, राजस्थान) अशी याप्रकरणी अटक करण्यात आलेल्यांची नावे आहेत.

याबाबत राजगड पोलिसांनी माहिती दिली. एक गुटखा वाहतूक करणारा टेम्पो शुक्रवारी पहाटे पुणे सातारा रस्त्याने पुण्याच्या बाजूला जाणार असल्याची माहिती राजगडचे पोलिस निरीक्षक सचिन पाटील यांना मिळाली होती. त्यानुसार पाटील यांच्या नेतृत्वाखाली सहाय्यक पोलिस निरीक्षक मनोजकुमार नवसरे, सहाय्यक फौजदार कृष्णा कदम, पोलिस हवलदार अजित माने आणि पोलिस नाईक तुषार खेंगरे यांच्या पथकाने खेड-शिवापूर टोल नाक्याजवळ सापळा रचला.

पहाटे चार वाजण्याच्या सुमारास मिळालेल्या माहितीच्या वर्णनाचा एक टेम्पो पुण्याच्या दिशेने जाताना आढळून आला. यावेळी या टेम्पोची तपासणी केली असता त्यात 14 लाख 17 हजार पाचशे रुपयांची वेगवेगळ्या गुटखा, पान मसाला आणि सुगंधी तंबाखूची पोती आढळून आली. हा सर्व माल आणि टेम्पो राजगड पोलिसांनी ताब्यात घेतला आहे. तसेच याप्रकरणी राजगड पोलिसांनी दोन जणांवर गुन्हा दाखल केला आहे. सहाय्यक पोलीस निरीक्षक मनोजकुमार नवसरे पुढील तपास करत आहेत.