पुणे - भारत आणि कोरियाच्या राजनैतिक संबंधांची ५० वर्षे पूर्ण झाल्यानिमित्त सावित्रीबाई फुले पुणे विद्यापीठात कोरिअन कला प्रदर्शनाचे आयोजन करण्यात आले आहे. सायन्स अँड टेक्नॉलॉजी पार्कच्या (एसटीपी) वतीने आयोजित हे प्रदर्शन रविवार (ता.१५) पर्यंत खुले राहणार आहे.

विद्यापीठातील संत ज्ञानेश्वर सभागृहातआयोजित या प्रदर्शनाचे उद्घाटन के आर्ट इंटरनॅशनल एक्सचेंज असोसिएशनच्या अध्यक्ष हिओ सूक, विद्यापीठाचे कुलगुरू डॉ. सुरेश गोसावी, प्र-कुलगुरू प्रा. पराग काळकर, कुलसचिव डॉ. प्रफुल्ल पवार, सायन्स अँड टेक्नॉलॉजी पार्कचे अध्यक्ष दिलीप बंड, पार्कचे महासंचालक डॉ. राजेंद्र जगदाळे, आर्ट पुणे फाउंडेशनचे संजीव आणि प्रियंवदा पवार आदी उपस्थित होते.

सकाळी ११ ते सायं ६ या वेळेत सर्वांसाठी विनामूल्य खुले असेल. प्रदर्शनासाठी आर्ट पुणे फाउंडेशनचे विशेष सहकार्य लाभले आहे. कोरियातील ३० चित्रकारांचे ८० मास्टरपिसेस पुणेकर रसिकांना अनुभविता येणार आहेत.

प्रदर्शनात कला प्रकारांचे विविध प्रकार आणि शैली अनुभविता येणार असून यामध्ये अमूर्त, लँडस्केप, प्रभाववादी, समकालीन चित्र शैलींचा समावेश असेल. ही सर्व चित्रे तैल, जलरंग, ऍक्रेलिक, थ्री डी आणि संमिश्र माध्यमातील असणार आहेत. कला संग्राहकांसाठी हे प्रदर्शन एक पर्वणी ठरेल. किम इनजून हे सदर कला प्रदर्शनाचे संचालक असून सचिन गुप्ता आणि पार्क सोयुंग हे क्युरेटर म्हणून काम पाहणार आहेत.