कोथरूड : त्रास होतोय म्हणून डॉक्टरचा सल्ला घेत पती-पत्नींनी कोविड तपासणी केली. पण, रिपोर्ट हातात येण्यापूर्वीच पतीचे निधन झाले. हा धक्का सहन न झाल्याने पत्नी बेशुध्द पडली. लोकप्रतिनिधी आणि त्यांच्या कार्यकर्त्यांनी सकाळी साडेदहा पासूनच फोनाफोनी करत रुग्णवाहिका बोलावली. परंतु, रुग्णवाहिका पोहचायला तीन तास लागले. प्रशासनाच्या या ढीम्म कारभारामुळं नागरिकांनी चीड व्यक्त केली. प्रमोदकुमार मंडल, (वय ३९ रा. केळेवाडी, हनुमाननगर गल्ली नं.१५) असे निधन झालेल्या व्यक्तीचे नाव आहे. त्यांच्या पत्नी नीरुदेवी मंडल यांना ससूनमध्ये पुढील उपचारासाठी दाखल करण्यात आले आहे. सुदैवाने त्या शुध्दीवर आल्या आहेत. त्यांचा कोविड अहवाल पॉझीटीव्ह आला आहे. त्यांच्यावर उपचार सुरू आहेत.

पुण्यातील इतर बातम्या वाचण्यासाठी येथे क्लिक करा

याबाबत मंडल यांच्या शेजारी राहणा-या किर्ती ओव्हाळ म्हणाल्या की, तब्येत बरी नव्हती म्हणून, मंडल यांनी प्रथम सोमवारी तपासणी केली. लवकर अहवाल आला नाही. म्हणून खासगीमध्ये त्यांनी दुसरी तपासणी केली. त्याचा अहवाल मंडल यांचा मृत्यू झाल्यानंतर आला. त्यांच्या पत्नी बेशुध्द झाल्याचे कळताच आम्ही हर्षवर्धन मानकरांना कळवले. त्यांचे कार्यकर्ते आल्यावर यंत्रणा हलली. नगरसेविका छाया मारणे, सामाजिक कार्यकर्ते दिलीप कानडे यांनी सातत्याने आरोग्य यंत्रणेशी संपर्क साधून रुग्णवाहिका बोलावत मंडल यांना उपचार मिळवण्यासाठी प्रयत्न केला. मंडल यांचे सहकारी रुपेश तावरे म्हणाले की, तपासणी अहवाल मिळण्यात होणारा उशीर हा रुग्ण संख्या वाढवण्यास कारणीभूत होत आहे. प्रत्येक गरजूला वेळेवर आरोग्यसेवा मिळावी. ब्लेम गेम नको.

आणखी वाचा - मोहोळ माफी मागा; ट्विटरवर सुरू झाला ट्रेंड

नगरसेविका छाया मारणे म्हणाल्या, 'नागरिकांचे जीव धोक्यात आहेत. रुग्णवाहिकेची मागणी करुनही प्रशासनाकडून योग्य ते सहकार्य मिळाले नाही. अशीच अवस्था राहीली तर माणसांचे जगणे अवघड होईल.' नगरसेवक दीपक मानकर म्हणाले, 'या भागात तातडीने कोविड सेंटर सुरू करावे. महापालिकेने आरोग्य कर्मचा-यांची तातडीने भरती करावी. जेणेकरुन आरोग्य यंत्रणेवर आलेला ताण कमी होईल. कोविड तपासणी अहवाल येण्यास जो विलंब लागतो आहे तो कमी कसा करता येईल यादृष्टीने प्रयत्न व्हायला हवेत. नागरिकांनीही स्वतःची काळजी घेत कोरोना नियमांचे पालन करावे. त्रास होत असल्यास तातडीने डॉक्टरांशी संपर्क साधून उपचार घ्यावेत. आजार लपवून स्वतःबरोबर इतरांचेही आरोग्य धोक्यात आणू नये.'