सातगाव पठार (पुणे) : परिसरातील बटाटा पिकाची काढणी सुरू झाली आहे. मात्र, सध्या पडत असलेल्या पावसामुळे शेतात पाणी साचून राहत असल्याने ट्रॅक्‍टरने अथवा बैल जोडीने बटाटे काढणे शक्‍य होत नाही. त्यामुळे अनेक शेतकरी मिळेल तसे मजुरांची व्यवस्था करून अक्षरक्ष हाताने बटाटे उपसून काढत आहे. मात्र, उत्पादित बटाटे चांगले निघत असल्याने शेतकरी वर्गात आनंदाचे वातावरण आहे. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

राज्यात सर्वाधिक बटाटा लागवड सातगाव पठार भागात केली जाते. पडणाऱ्या पावसावरच येथील शेती व बटाटा पीक अवलंबून आहे. येथे बटाटा काढणीसाठी अनेक ठिकाणांहून परिसरातील मजूर येतात. मात्र, या वर्षी करोनाच्या संसर्गामुळे मजुरांची टंचाई भासत आहे. येथील सात ते आठ हजार एकर शेती क्षेत्रात बटाटा लागवड झाली आहे. काढणीला आलेला बटाटा हा वेळेतच काढावा लागतो. त्यामुळे शेतकऱ्यांनी कोरोनाचा प्रादुर्भाव व मजुरांची कमतरता असली तरी सोशल डिस्टन्सचा वापर करून वेळेतच बटाटा काढणी सुरू केली आहे. 
 

Breaking : राज्य सरकारने रेडी-रेकनरच्या दरात केली वाढ; सर्वाधिक पुणे जिल्ह्यात तर...

कोरोनामुळे मजूर उपलब्ध होत नाहीत. त्यामुळे घरातील उपलब्ध माणसे व काही मजूर आणून ट्रॅक्‍टरच्या साहाय्याने बटाटा काढणी चालू आहे. एका मजुरांच्या जोडीला एका दिवसासाठी साधारणतः 500 ते 600 रुपयांपर्यंत मजुरी द्यावी लागते. मजुरीचा खर्च वाढत असल्याने शेतकऱ्यांच्या भांडवली खर्चात वाढ होणार आहे. 
- विकास बारवे, बटाटा उत्पादक शेतकर, कुरवंडी (ता. आंबेगाव) 

 

सध्या मजुरांची कमतरता असली, तरी वेळेतच बटाटा पिकाची काढणी सुरू केली आहे. मात्र, पावसामुळे काढणीची कामे ठप्प होत आहेत. सध्या रोजच पाऊस मोठ्या प्रमाणावर पडत आहे. त्यामुळे जर अधिकच पाऊस झाला, तर बटाटा काढणीची कामे काही दिवसांसाठी ठप्प होतील. मात्र, त्यामुळे बटाटा पिकास धोका निर्माण होऊ शकतो. 
- अनिल एरंडे, बटाटा उत्पादक शेतकरी, कोल्हारवाडी (ता.आंबेगाव)