कामशेत : लोकसंख्या चाळीस हजारांवर आहे. पण नागरिकांची सुरक्षितता फक्त 28 पोलिसांवर आहे. कामशेत पोलिस ठाण्याच्या हद्दीत अधिकारी व कर्मचाऱ्यांची 33 पदे रिक्त आहेत. त्यामुळे अपेक्षित सुरक्षाव्यवस्थेचा प्रश्न पुढे आला आहे.

ताज्या बातम्यांसाठी ई-सकाळचे ऍप डाऊनलोड करा 

कामशेत येथे 17 सप्टेंबर 2017 मध्ये पोलिस ठाण्याची स्थापना झाली. स्वतंत्र पोलिस ठाण्याचा दर्जा मिळाल्यावर आत्तापर्यंत 61 कर्मचारी मंजूर करण्यात आले असून, फक्त 31 कर्मचारी कार्यरत आहेत. पोलिस ठाण्याच्या स्थापनेपासून कधीच मंजूर पदांची पूर्तता पोलिस ठाण्यात झालेली नाही. सध्या एक पोलिस निरीक्षक, 2 पोलिस उपनिरीक्षक, 3 सहाय्यक फौजदार, 7 पोलिस हवालदार, 5 पोलिस नाईक, 7 पोलिस कॉन्स्टेबल, 2 महिला पोलिस व 2 वाहनचालक कार्यरत आहेत. तर 
एक सहाय्यक पोलिस निरीक्षक, 2 पोलिस निरीक्षक, 3 सहाय्यक फौजदार, 6 पोलिस हवालदार, 8 पोलिस नाईक, 10 पोलिस कॉन्स्टेबल ही पदे रिक्त आहेत.

व्हाईस रेकॉर्ड करा अन् फेसबुककडून पैसे मिळवा!

मावळातील जनता शांत आणि संयमी असल्याने ते पोलिस मित्र म्हणून वागत आली आहे , तर दुसरीकडे खाकीचा दरारा खेडोपाडी आजही कायम आहेच, तिचा मानसन्मान राखलाही जातो ही वस्तुस्थिती असली तरी जनतेच्या सुरक्षिततेला विसरून चालणार नाही. तसेच खाकीतील कर्मचाऱ्यांनाही एक दिवसाच्या साप्ताहिक सुट्टीची अपेक्षा आहे हे ही गृहीत धरायला पाहिजे.

मुख्य बाजारपेठ असल्याने  नागरिकांची बाजारपेठेत कायम वर्दळ असते. वाहतूक कोंडी नित्याची झाली आहे. शाळा महाविद्यालयात कायदा व सुव्यवस्था राखणे पोलिसांच्या जिकरीचे ठरत आहे. पेट्रोलिंग करण्यात अडचणी येत आहे.

निवडणुका, सण, समारंभ, मिरवणुका बंदोबस्त देण्यासाठी कर्मचारी संख्या अपुरी पडत आहे. महामार्गावर होणारे अपघात व लुटमरीचे गुन्ह्ये व खुनाच्या गुन्ह्यातील तपास करण्यात उपलब्ध कर्मचारी गुंतलेले असतात.

अनेक कर्मचाऱ्यांना त्यांच्या हक्काची साप्ताहिक सुट्टी देखील मिळणे, अवघड झाले आहे. पोलिस ठाण्यात पुरेसे मनुष्यबळ उपलब्ध करून देण्याची मागणी नागरिकांमधून होत आहे.