निरगुडसर - वेळ रात्रीची नऊ वाजून १२ मिनिटांची. आपल्या हरवलेल्या पिलाचा शोध घेत बिबट्याची मादी आली अन्‌ तिने पाहिले आणि अवघ्या दोन ते तीन मिनिटांच्या कालावधीत मादी आपल्या पिलाला घेऊन गेली. अशा प्रकारे मंगळवारी रात्री माणिकडोह बिबट निवारा केंद्राच्या टीमकडून करण्यात आलेल्या बिबट पिलू पुनर्वसनात ५२ वे बिबट पिलू आपल्या आईच्या कुशीत विसावलं. 

नागापूर (ता. आंबेगाव) येथे मंगळवारी सकाळी नारायण म्हस्के यांच्या शेतातील ऊसतोडणी करताना ऊसतोड कामगारांना बिबट पिलू सापडले होते. सापडलेल्या पिलाला अवसरी घाटातील वनविभागाच्या केंद्रात नेण्यात आले. सायंकाळी माणिकडोह बिबट निवारा केंद्राचे डॉ. अजय देशमुख यांनी बिबट पिलाची वैद्यकीय तपासणी केली. त्यांनी ते तंदुरुस्त असल्याचा अहवाल दिला. मग सायंकाळी साडेसात वाजता ज्या ठिकाणी हे बिबट पिलू सापडलं त्याच ठिकाणी हे नर जातीचे बिबट पिलू छिद्र असलेल्या एका विशिष्ट बॉक्‍समध्ये ठेवून केंद्राची सर्व टीम व वनविभागाचे अधिकारी ५०० मीटरवर गाडीत जाऊन थांबले. पिलावर लक्ष ठेवण्यासाठी कॅमेरे लावण्यात आले होते. पिलाचा आवाज कानावर पडताच नऊ वाजून १२ मिनिटांनी बिबट मादी त्या बॉक्‍सपाशी आली.

ती दोन ते तीन मिनिटांत पिलाला घेऊन निघून गेली. पिलाला सोडण्यात डोळस, सलीम शेख, शिवाजी मोधे, योगेश काशीद या टीमसह अधिकारी प्रज्योत पालवे, वनपाल मंगेश गाडे, वनरक्षक भानुदास भालेराव, पूजा पवार, मारुती मुंडकर, संपत भोर, दशरथ मेंगडे, शरद जाधव यांनी सहभाग घेतला.