Lockdown : राज्य सरकारने खासगी दूध संघाचे अतिरिक्त दूध खरेदी करावे : कुतवळ
पुणे : राज्यातील दूध उत्पादक शेतकरी सध्या प्रचंड अडचणीत आहेत. त्यामुळे राज्य सरकारने केवळ सहकारीच नव्हे, तर खासगी दूध संघांचेही अतिरिक्त दूध खरेदी करावे, अशी मागणी महाराष्ट्र राज्य दूध उत्पादक व प्रक्रिया व्यावसायिक कल्याणकारी संघाचे सचिव प्रकाश कुतवळ यांनी केली आहे.
सहकारी असो की खासगी दूध संघ, हे सर्व संघ शेतकऱ्यांकडूनच दूध खरेदी करत असतात. त्यातही राज्यातील एकूण दूध उत्पादनापैकी सुमारे ८० टक्के दूध हे खासगी दूध संघ खरेदी करत असतात. सहकारी संघांचा खरेदीचा वाटा हा केवळ २० टक्केच असल्याचेही कुतवळ यांनी यावेळी स्पष्ट केले.
राज्य सरकारने सोमवारपासून (आजपासून) सहकारी दूध संघाकडील अतिरिक्त दूध खरेदी करण्यास सुरुवात केली आहे. या दुधापासून पावडर तयार केले जाणार आहे. या पावडरसाठी ४ खासगी पावडर निर्मिती प्रकल्पांची निवड करण्यात आली आहे.
संबंधित सहकारी दूध संघांनी खरेदी केलेले अतिरिक्त दूध निवड करण्यात आलेल्यापैकी जवळच्या पावडर प्लॅंटमध्ये जाऊन ते तेथे देण्यास सुरुवात केली आहे.
राज्यात संचारबंदी चालू असल्याने दुधाच्या मागणीत घट झाली. परिणामी सहकारी दूध संघांनी मागणीवर आधारित खरेदी करण्यास सुरुवात केली. यामुळे शेतकऱ्यांकडील दूध अतिरिक्त राहू लागले. याचाच फायदा घेण्यासाठी खासगी दूध संघांनीही खरेदी दर खूप मोठ्या प्रमाणात कमी केले. यामुळे दूध उत्पादक शेतकरी अडचणीत सापडले होते.
यावर मार्ग काढण्यासाठी राज्यातील अतिरिक्त १० लाख लिटर दूध सरकारमार्फत खरेदी करण्याचा निर्णय राज्य सरकारने घेतला होता. यानुसार येत्या ३१ मेपर्यंत प्रतिलिटर २५ रुपये दराने हे दूध खरेदी करण्यात येणार आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.