पुणे :  चंडीगडमध्ये व्यवसाय सुरू करून देण्यासाठी 50 कोटी रुपयांचे कर्ज मिळवून देण्याच्या आमिषाने प्रसिद्ध सराफ व्यावसायिक पु. ना. गाडगीळ यांना एक कोटी 60 लाख 50 हजार रुपयांचा गंडा घालण्यात आला आहे. या प्रकरणी सौरभ विद्याधर गाडगीळ (वय 43) यांनी विश्रामबाग पोलिस ठाण्यात फिर्याद दिली आहे.

गाडगीळ यांनी दिलेल्या फिर्यादीवरून रोहितकुमार शर्मा (वय 59) विरोधात गुन्हा दाखल करण्यात आला. हा प्रकार ऑक्‍टोबर 2018 ते फेब्रुवारी 2019 या कालावधीत घडला. पोलिसांनी दिलेल्या माहितीनुसार, पु. ना. गाडगीळ ज्वेलर्सची शाखा चंडीगड येथे उघडण्यासाठी 50 कोटीचे कर्ज मिळवून देतो, असे आमिष दाखवत रोहितकुमार शर्मा याने गाडगीळ यांच्या पुण्यातील कार्यालयात येऊन त्यांच्याशी संपर्क साधला. त्यांचा विश्वास संपादन करून कर्ज वितरणासाठी आणि प्रक्रिया शुल्क म्हणून फिर्यादींकडून 1 कोटी 60 लाख 50 हजार रुपये घेतले. 

पुणे जिल्ह्यातील मतदान केंद्रावर 'राडा'; दोन्ही गटातील कार्यकर्ते भिडले​

दरम्यान पैसे देऊन अनेक दिवस उलटून गेल्यानंतरही कर्जाची प्रक्रिया किंवा पैसे मिळत नसल्यामुळे आपली फसवणूक झाल्याचे फिर्यादी यांच्या लक्षात आले. त्यानंतर त्यांनी फिर्याद दिली आहे. या गुन्ह्याचा अधिक तपास गुन्हे शाखेचे पोलिस उपनिरीक्षक कुलकर्णी करीत आहेत.

पुण्यातील इतर बातम्या वाचण्यासाठी क्लिक करा