पुणे - इंग्लंडमध्ये (England) चांगल्या पगाराची नोकरी (Job) मिळवून देण्याचे आमिष (Lure) दाखवून अनोळखी व्यक्तीने एका उच्चशिक्षित तरुणाला (Youth) पावणे पाच लाख रुपयांना गंडा (Cheating) घातला. अनोळखी व्यक्तीविरुद्ध सिंहगड रोड पोलिस ठाण्यात गुन्हा (Crime) दाखल करण्यात आला आहे. (Lure Job in England Fell Highly Educated Young Man Tune of Five Lakhs)

याप्रकरणी उज्वल काकडे (वय 30, रा. माणिकबाग, सिंहगड रोड) यांनी सिंहगड रोड पोलिस ठाण्यात फिर्याद दिली आहे. फिर्यादी उज्ज्वल यांनी इंग्लंडमधून एमएससीचे शिक्षण पुर्ण केले आहे. त्यानंतर ते वर्षभरापुर्वी भारतात परतले. तेव्हापासून ते नोकरीच्या शोधात होते. नोकरीसाठी त्यांनी एका संकेतस्थळावर त्यांची वैयक्तीक माहिती भरून दिली होती. दरम्यान, 24 फेब्रुवारीला त्यांना एक ईमेल आला. त्यानुसार, इग्लंडमधील एका नामांकित कंपनीत स्टोअर किपर मॅनेजरची नोकरी उपलब्ध असल्याचे सांगून त्यांना चांगला पगार देण्याबाबत ईमेलमध्ये नमूद केले होते. त्यानंतर फिर्यादीने संबंधीत ईमेलला प्रतिसाद देताना वैयक्तीक माहिती पाठविली. त्यानंतर त्यांना नोकरीसाठी व्हिसाची प्रक्रिया करावी लागेल, असे सांगून त्यांच्याकडे काही रक्कम मागण्यात आली.

तसेच पैसे पाठविण्यासाठी एका बॅंक खात्याचा क्रमांकही फिर्यादीस पाठविण्यात आला. फिर्यादीने त्यांच्यावर विश्‍वास ठेवून ठराविक रक्कम पाठविली. त्यानंतर संबंधीत व्यक्तीनी सातत्याने वेगवेगळी कारणे सांगून फिर्यादीकडून चार लाख 67 हजार रुपये काढून घेतले. त्यानंतरही त्यांच्याकडून नोकरीसाठी कुठलेच प्रयत्न होत नव्हते, तसेच पैशांची मागणीही वाढत चालली होती. त्यानंतर आपली फसवणूक झाल्याचे लक्षात आल्यानंतर त्यांनी सायबर पोलिसांकडे तक्रार अर्ज दाखल केला. या अर्जाची चौकशी झाल्यानंतर सिंहगड रोड पोलिस ठाण्यात गुन्हा दाखल करण्यात आला. या प्रकरणाचा तपास पोलिस निरीक्षक (गुन्हे) प्रमोद वाघमारे करीत आहेत.