मोशी - विडा ३० लाख, ओटी ११ लाख आणि हार, ताट, लिंबू हे पाच लाखांना... हे दर कोणत्याही वस्तूंचे नसून, ते आहेत मोशीतील श्री नागेश्‍वर महाराजांच्या परंपरागत मानाचे. यंदा हा मानाच्या विड्याचा मान माजी नगरसेवक बबनराव रामचंद्र बोराटे व हवेली बॅंकेचे माजी अध्यक्ष संजय बबनराव बोराटे यांना मिळाला. दिलीप किसन सस्ते यांना मानाची ओटी; मानाचे हार, ताट, लिंबूंचा मान गणेश तुकाराम कुदळे आणि मानाचे लिंबू संभाजी बबन बोऱ्हाडे यांना मिळाला, असे श्री नागेश्‍वर महाराज देवस्थान ट्रस्टकडून सांगितले.

ताज्या बातम्यांसाठी ई-सकाळचे ऍप डाऊनलोड करा 

श्री नागेश्‍वर महाराज भंडारा उत्सवामधील प्रमुख आकर्षण आणि उत्कंठा असलेला विषय म्हणजे नागेश्‍वर महाराजांना अर्पण केलेल्या वस्तूंच्या लिलावाचा. गेली अनेक वर्षे ही परंपरा ग्रामस्थ जपत आहेत. श्री नागेश्‍वर महाराज भंडारा उत्सव व आराध्यदैवत श्री भैरवनाथ महाराज यात्रा साजरी करतात. शनिवारी या भंडारा उत्सवाची सुरुवात श्री नागेश्‍वर महाराज पादुकांना महाभिषेक घालून झाली. मानाचा कलश व पादुकांची मंदिर ते आमराईतील महाराजांच्या तपोभूमीपर्यंत वाजतगाजत मिरवणूक काढण्यात आली.

पुणेकर ओढतात रोज सात सिगारेटचे झुरके ! 

तपोभूमीमध्ये होम करण्यात आला. महाराजांच्या पादुकांचे दर्शन घेण्यासाठी व विविध वस्तू अर्पण करण्यासाठी भाविकांनी गर्दी केली होती. सायंकाळी बुंदी व शाकभाजी या महाप्रसादाचे वाटप झाले. रविवारी (ता. २३)  महाराजांना अर्पण केलेले चांदीचे नंदी, नागदेवता, पितळी घंटा, मूर्ती, नारळ तोरणे, मानाचे लिंबू, प्रसाद म्हणून बुंदी, पेढे, गूळ, साखर तसेच विविध वस्तू यांचा सकाळी नऊ ते सायंकाळी सहापर्यंत मंदिर सभागृहात लिलाव सुरू होता.