इंदापूर (पुणे) : कोरोना महामारीच्या संकटकाळात तालुक्यातील जनतेला दमडीची देखील मदत न करणाऱ्या विरोधकांनी पुतणा मावशीच्या प्रेमाप्रमाणे जनतेविषयी कळवळा आणू नये, असा पलटवार सामान्य प्रशासन राज्यमंत्री दत्तात्रेय भरणे यांनी माजी सहकारमंत्री हर्षवर्धन पाटील यांच्यावर केला.
हर्षवर्धन पाटील यांनी काल भरणे यांच्यावर कोरोना काळात सुरफाट्या खेळणे, पतंग उडविण्यावरून टीका केली होती. त्यास भरणे यांनी आज उत्तर दिले. ते म्हणाले की, कोरोना संचारबंदी काळात अनेकांचे रोजगार गेल्याने त्यांच्या उदरनिर्वाहाचा प्रश्न निर्माण झाला. त्यामुळे जनसेवक म्हणून मागील चार महिन्यापासून प्रत्येक गावात गरजू कुटुंबांना जीवनोपयोगी अन्नधान्य किट वाटप केले. मात्र, ज्या जनतेच्या जोरावर विरोधकांनी वीस वर्ष लोकप्रतिनिधी म्हणून काम केले, ज्यांच्याकडे सहकारी संस्था आहेत, त्यांनी मात्र गोरगरीब जनतेला मदत न करता कोरोना काळात विधान परिषदेवर वर्णी लागावी म्हणून भाजप नेत्यांकडे दिल्ली व मुंबई येथे वाऱ्या करण्यात धन्यता मानली. त्यांना माझ्यावर टीका करण्याचा नैतिक अधिकार नाही.
भरमे म्हणाले की, कोरोना काळातील रक्ताचा तुटवडा लक्षात घेऊन आम्ही 10 हजार बाटल्या रक्तसंकलन केले. त्यामुळे अनेकांना जीवदान मिळाले. राज्यात रक्तसंकलन व जीवनावश्यक वस्तू वाटपाच्या इंदापूर पॅटर्नचे कौतुक झाले. विरोधक मात्र घरात बसून राहिले. त्यांनी एक बाटली रक्त देखील गोळा केले नाही. कोरोनाच्या काळात युवकांमध्ये उत्साह वाढवा, त्यांची भीती कमी व्हावी म्हणून सुरक्षित अंतर ठेवून सूरफाट्या खेळलो. विधानसभा निवडणुकीत दोन वेळा जनतेने विरोधकांचा राजकीय पतंग काटून त्यांचा सूर घालवला आहे. त्यांचा पतंग पुन्हा आकाशात कधी उडणार नाही, याची काळजी जनता घेत आहे. त्यामुळे विरोधकांनी टीका न करता विश्रांती घ्यावी.
कोरोना संसर्ग तालुक्यात रोखण्यासाठी अधिकाऱ्यांमार्फत सर्व उपाययोजना राबविल्या जात आहेत. त्यासाठी अधिकाऱ्यांच्या आढावा बैठका नियमितपणे घेतल्या जात आहेत. ज्या भागात कोरोना रुग्ण आढळले आहेत, त्या भागात जाऊन नागरिकांशी चर्चा केली आहे. रुग्णांना आरोग्य सेवा व्यवस्थित पुरवल्या आहेत. या उलट विरोधकांनी कोरोनाबाधित ठिकाणी न जाता नगरपरिषद व तहसील कार्यालयात कोणताही अधिकार नसताना बैठका घेऊन त्याची प्रसिद्धी मिळवली. प्रसिद्धीची हाव कोणाला आहे, हे तालुक्यातील जनतेला गेली 20 वर्षांपासून माहिती आहे, अशी टीका भरणे यांनी केली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.