पुणे - मॉन्सूनला (Monsoon) पुढे सरकण्यासाठी पोषक वातावरण (Environment) तयार झाले आहे. अंदमानात मॉन्सून दाखल झाल्यानंतर शनिवारी (ता. २२) बंगालचा उपसागर (Bengal Sea) आणि श्रीलंकेच्या दक्षिण भागापर्यंत त्याने मजल मारली आहे. बंगालच्या उपसागरात कमी दाबाच्या क्षेत्राची तीव्रता वाढत असल्याने मॉन्सून आणखी वेगाने पुढे सरकण्याची शक्यता आहे. त्यामुळे या भागात जोरदार पाऊस (Rain) पडण्याचा अंदाज हवामान विभागाने वर्तविला आहे. (Monsoon Enter in Bengal Sea)

भारताच्या पश्‍चिमी किनारपट्टीवर ‘तौक्ते’ चक्रीवादळाने धुमाकूळ घातल्यानंतर आता पूर्व किनारपट्टीवर आणखी एका चक्रीवादळासाठी पोषक वातावरण आहे. अंदमान समुद्र आणि बंगालच्या पूर्व-मध्य उपसागरात शनिवारी कमी दाबाचे क्षेत्र तीव्र झाले आहे. या क्षेत्राची तीव्रता वाढत असल्याने येत्या बुधवारी (ता. २६) आणि गुरुवारी (ता.२७) हे चक्रीवादळ पूर्व किनाऱ्यावर धडकणार आहे. हे चक्रीवादळ तीन दिवस असण्याचा अंदाज भारतीय हवामान विभागाने व्यक्त केला आहे.

हवामान विभागाच्या सूत्रांनी दिलेल्या माहितीनुसार, हे चक्रीवादळ ईशान्येकडे सरकणार आहे. ते बुधवारपर्यंत ओडिशा आणि बंगालच्या किनारपट्टीपर्यंत पोहोचण्याची शक्यता आहे. दरम्यान ओडिशा, पश्‍चिम बंगाल, आसाम आणि मेघालयामध्ये मंगळवारपासून हलक्या पावसाला सुरुवात होणार आहे. त्यानंतर या पावसाची तीव्रता वाढण्याची शक्यताही वर्तवली आहे. पूर्व-मध्य बंगालच्या उपसागरात कमी दाबाच्या क्षेत्राचे चक्रीवादळात रूपांतर होत असताना बंगालच्या उपसागरात व अंदमान सागरात ताशी ४५ ते ५५ किमी वेगाने वारे वाहू शकतात. ते बंगालच्या खाडीपर्यंत येईपर्यंत ताशी ७० किमीची वेग पकडू शकतात.या चक्रीवादळामुळे या काळात कोणत्याही मच्छीमारांनी समुद्रात जाऊ नये. तसेच किनारी भागातही राहू नये असा इशारा देण्यात आला आहे.