मुंबई : तळोजा तुरुंगातून सुटका झाल्यावर समर्थकांसह मिरवणूक आणि हुल्लडबाजी केल्याचा आरोप असलेला आरोपी गजानन मारणे रॉबिनहूड आहे का, असा उपरोधिक सवाल मुंबई उच्च न्यायालयाने मंगळवारी (ता.२३) केला. तुरुंगातील बंदींना कोरोना संसर्ग होऊ नये म्हणून न्यायालय पॅरोल देत आहे आणि तुम्ही मिरवणुका काढता, असे खडे बोलही खंडपीठाने सुनावले.

- Breakfast Updates: पेट्रोल-डिझेलच्या दरात कपात ते जर्मनी लॉकडाऊन, महत्त्वाच्या बातम्या एका क्लिकवर​

कुख्यात गुंड मारणे तळोजा तुरुंगात मागील कित्येक वर्षे खुनाच्या खटल्यात अटकेत होता. गेल्या महिन्यात त्याची निर्दोष सुटका झाली झाली त्यावेळी तुरुंगाबाहेर त्याचे समर्थक मोठ्या संख्येने जमा झाले होते. त्यांनी मुंबई-पुणे प्रवासात सुमारे तीस मोटारींच्या ताफ्यासह मिरवणूक, घोषणाबाजी केली आणि टोलनाक्‍यावर हुल्लडबाजी केली. यावर टीका झाल्यावर पोलिसांनी आठ तक्रारी दाखल केल्या. तक्रारी रद्द करण्यासाठी मारणेने उच्च न्यायालयात याचिका केली आहे. न्या. एस. एस. शिंदे आणि न्या. मनीष पितळे यांच्या खंडपीठापुढे यावर मंगळवारी सुनावणी झाली. याचिकेवर पुढील सुनावणी ५ एप्रिलला होणार आहे.

- लॉकडाऊननंतर ओटीटीचा वापर सर्वाधिक वाढला​

दरम्यान, गुंड गजा मारणेच्या मिरवणुकीप्रकरणी पुणे पोलिसांनी आतापर्यंत १०० हून अधिकांना अटक केली आहे. तसेच जवळपास ३० हून अधिक आलिशान गाड्याही जप्त केल्या आहेत. मारणेच्या मिरवणुकीचा व्हिडिओ सोशल मीडियात व्हायरल झाला होता, त्यामुळे नवी मुंबई, रायगड, पिंपरी-चिंचवड आणि पुणे या मार्गाने प्रवास करणाऱ्या मारणेच्या साथीदारांवर गुन्हे दाखल करण्यात आले होते. 

मिरवणुकीनंतर पुणे पोलिसांनी मारणेला साताऱ्यात अटक केली. आणि महाराष्ट्र धोकादायक उपक्रम अधिनियम (MPDA) अंतर्गत मारणेची येरवडा मध्यवर्ती कारागृहात रवानगी करण्यात आली आहे. 

- पुणे शहर आणि जिल्ह्यातील बातम्या वाचण्यासाठी येथे ► क्लिक करा

(Edited by: Ashish N. Kadam)