पिंपरी - सार्वजनिक ठिकाणी व महापालिकेच्या जागेत नागरिकांना बसण्यासाठी बाके ठेवण्यात येतात. हा नियम धाब्यावर बसवून पदाधिकाऱ्यांनी मनमानी पद्धतीने अनावश्‍यक ठिकाणी बाके बसविली आहेत. हातगाड्या व हॉटेलमालकांनी व्यवसायासाठी बाकांची पळवापळवीच केली आहे. त्यामुळे बाकांचा वापर नेमका कोणासाठी, असा प्रश्‍न नागरिकांना पडला आहे.

ताज्या बातम्यांसाठी डाऊनलोड करा ई-सकाळच ऍप 

पदाधिकाऱ्यांनी आपापल्या वॉर्डातील उद्यानांत बाके बसविली आहेत. यासाठी स्वतंत्र तरतूद आहे. मात्र, उद्यान वगळता इतर ठिकाणी बसविण्यात येणाऱ्या बाकांसाठी स्वतंत्र तरतूद नाही. वॉर्डात सुरू असलेल्या एखाद्या विकासकामांमधूनच स्थापत्य विभागाकडून बाके मागविली जातात. त्यासाठी सबटेंडरची पद्धत असून, एका बाकासाठी पाच हजार सहाशे रुपये द्यावे लागतात. रस्त्यांवर, वर्दळीच्या ठिकाणी, ज्येष्ठ नागरिकांच्या कट्ट्यावर बाके बसविणे गरजेचे आहे. मात्र, प्रत्येक वॉर्डात मागेल त्याला बाकवाटप केले आहेत. आठही प्रभागांमध्ये शेकडो बाकांचे वाटप झाले आहे. याची महापालिकेत मोजदाद नाही. संत तुकारामनगर, अजमेरा कॉलनी येथे सोसायट्यांमध्ये बाके ठेवली आहेत. तर वाल्हेकरवाडी, बिजलीनगर येथे बैठ्या घरांबाहेर, टेरेसवर, हातगाडी दुकानदारांकडे, गॅरेज व हॉटेलचालकांकडे ही बाके आढळली आहेत. 

शेवटी भंगारात
वॉर्डात बाकांची गरज असल्यास नगरसेवक अर्ज करून तशी मागणी प्रभाग स्तरावर करतात. अधिकारी बाकांची जागा ठरवून ती बसवितात. बाके तुटल्यावर त्याची दुरुस्तीही होत नसल्याचे चित्र आहे. शेवटी अशी बाके भंगारात जमा होतात. शहरभर ठिकठिकाणी अशी तुटलेली मोडकळीस आलेली बाके पडलेली दिसतात.