पुणे - पुणे महापालिकेच्या शिक्षण विभागाकडे कार्यरत असलेल्या रोजंदारी कर्मचारी, बालवाडी शिक्षिका व सेविकांना दर महिन्याला पगारासाठी प्रतिक्षा करावी लागत आहे. आधीच तुटपुंजा पगारात हे कर्मचारी काम करत असताना मे महिन्याचा पगार अद्याप झालेला नसल्याने हे कर्मचारी हवालदिल झाले आहेत.

पुणे महापालिकेच्या शहरात बालवाड्या आहेत. तेथे सुमारे ८५० अंगणवाडी शिक्षिका, सेविका कार्यरत आहेत. तर रोजंदारीवर काम करणारे चतुर्थ श्रेणीतील सुमारे ४५० कर्मचारी आहेत. त्यांना गेल्या वर्षभरापासून १५ ते २० तारखेनंतर पगार दिला जात आहे. यासाठी पुणे महानगरपालिका कामगार युनियनने शिक्षण विभाग, महापालिका आयुक्तांना वारंवार निवेदन देऊनही त्याकडे दुर्लक्ष केले जात आहे.

बालवाडी शिक्षिका, सेविका पगाराबाबत चौकशी करण्यासाठी गेल्यानंतर शिक्षण विभागातील प्रशासकीय अधिकारी पाच तारखेच्या आत वेतन देऊ असे सांगतात, पण त्याची अंमलबजावणी केलीच जात नाही. त्यामुळे वेतनास उशीर करणाऱ्या कर्मचाऱ्यांवर कारवाई करावी अशी मागणीही युनियनने केली असली तरीही अद्याप कार्यपद्धतीत बदल झालेला नाही.

वेतनवाढीकडेही दुर्लक्ष

बालवाडी शिक्षिका, सेविकांना दर दोन वर्षानंतर १० टक्के पगारवाढ देण्याचा निर्णय २०१८ मध्ये घेतला आहे. त्यानुसार २०२० मध्ये एक पगारवाढ झाली. २०२२ मध्ये दुसरी पगारवाढ करणे आवश्‍यक होते, पण अद्याप त्याची कार्यवाही देखील सुरू झालेली नाही. बालवाडी शिक्षिकेला १२ हजार ५०० तर सेविकेला ९ हजार ५०० रुपये पगार आहे, असे रोहिणी जाधव यांनी सांगितले.