मार्केट यार्ड : बाजारात केशरी, पिवळी संत्री दिसू लागली आहे. चवीला आंबट गोड असणाऱ्या संत्र्यांचा मोहक असा पिवळा आणि केशरी रंग पाहून संत्री सोलून खाण्याचा मोह कुणालाही आवरता येत नाही. त्यामुळे दरवर्षी संत्र्यांना मोठी मागणी असते. फळ बाजारात नागपूर येथील संत्र्याचा हंगाम सुरू झाला आहे. यंदा चांगल्या पावसामुळे संत्र्याचे उत्पादन मोठ्या प्रमाणात आहे. तसेच मालाचा दर्जाही चांगला आहे.

बाजारात आवकेच्या तुलनेत संत्र्याला मागणी चांगली आहे. तसेच मालाचा दर्जा चांगला असल्याने भावही मागील वर्षीच्या तुलनेत जास्त आहेत. शहर उपनगरासह गोवा येथून संत्र्याला मोठी मागणी असते. फळबाजारात परतवाडा या भागातून दररोज ४०-५० टन इतकी संत्र्याची आवक होत असल्याचे मार्केट यार्डातील व्यापारी करण जाधव यांनी सांगितले. यंदा पाऊस हंगाम वेळेवर सुरू झाला आहे. पाऊस चांगला झाल्याने संत्र्याचे उत्पन्न मागील वर्षीच्या तुलनेत जास्त आहे.

सुरूवातीला बाजारात चार तर पाच टन इतकीच संत्रीची आवक होत होती. हंगामाच्या सुरूवातीला संत्री चवीला आंबट गोड होती. आता हंगाम बहरला असून बाजारात दाखल होत असलेली संत्री चवीला गोड असून त्याचा आकार आणि दर्जाही चांगला असल्याचे जाधव यांनी सांगितले.

येथून येते संत्री नागपूर, परतवाडा, अंजनगाव, अचलपुर, वरूड, चिखली, अमरावती या भागातून संत्र्याची आवक होत आहे. सध्या बाजारात दर्जानुसार संत्र्याच्या ८ ते १० डझनाच्या एका पेटीस ८०० ते १००० रूपये, ११ ते १२ डझनाच्या पेटीस ७०० रुपये, १४ डझन पेटीस ६०० रुपये भाव मिळत आहे.

'यंदाचा हंगाम मागील वर्षीच्या तुलनेत अतिशय चांगला आहे. परतवाडा हे संत्र्याचे हब आहे. या संत्र्याला राज्य परराज्यातील ग्राहकांसह घरगुती ग्राहक, ज्युस विक्रेते यांच्याकडून चांगली मागणी आहे. ऑक्टोंबर महिन्यापासून संत्र्याचा हंगाम सुरू होऊन तो जानेवारी महिन्याअखेरपर्यंत संपतो.'

- करण जाधव, व्यापारी, मार्केट यार्ड