पुणे - शिक्षणातील गुणवत्ता वाढविण्याच्या हेतूने सक्षम मार्गदर्शक घडविण्यासाठी देशात लवकरच राष्ट्रीय शिक्षक शिक्षण परिषदेतर्फे (एनसीटीई) ‘नॅशनल मिशन फॉर मेन्टॉरिंग’ अभियान कार्यान्वित करण्यात येत आहे. या अभियानांतर्गत मार्गदर्शक सूचनांचा मसुदा तयार केला आहे. देशपातळीवर अभियान राबविण्यासाठी लवकरच अंतिम मसुदा तयार केला जाणार आहे.

एनसीटीईतर्फे ‘नॅशनल मिशन फॉर मेन्टरिंग’ हे अभियान प्रस्तावित केले आहे. शाळा आणि महाविद्यालयांच्या पातळीवर हे अभियान राबविण्यासाठी ‘ब्ल्यू बुक फॉर मेन्टरिंग’ या नावाने मार्गदर्शक सूचना प्रसिद्ध केल्या आहेत. प्राथमिक स्वरूपात असणाऱ्या या मार्गदर्शक सूचनांच्या मसुद्यावर हरकती, सूचना मागविण्यात आल्या आहेत. त्यावर आलेल्या हरकती, सूचनांचा विचार करून त्यानंतर मार्गदर्शक सूचनांचा अंतिम मुसदा तयार करून तो अभियानांतर्गत कार्यान्वित केला जाणार असल्याचे एनसीटीईने स्पष्ट केले आहे.

शिक्षक आणि मुख्याध्यापकांनी आताच्या काळात नव्याने निर्माण झालेल्या आव्हानांना तोंड देण्याची गरज आहे. तसेच नव्या शैक्षणिक धोरणात शिक्षण क्षेत्राच्या रचनेत संपूर्ण बदल, वेगवेगळ्या स्तरावर मार्गदर्शन (मेन्टॉरिंग) प्रस्तावित केले आहे. त्यात विद्यार्थ्यांसह शिक्षकांसाठीही मार्गदर्शक तरतूद केली आहे. शिक्षकांचा आंतरविद्याशाखीय दृष्टिकोन विकसित करण्यावर भर देण्यात आला आहे. त्यामुळे बदलत्या काळासह जुळवून घेण्यासाठी शिक्षकांमधील क्षमता, कौशल्य वाढविण्याची गरज लक्षात घेऊन त्यांना व्यावसायिक पद्धतीने मार्गदर्शन करण्यासाठी हे अभियान सुरू करण्यात येणार आहे.

या अभियानांतर्गत शिक्षकांना प्रशिक्षण दिले जाणार आहे. त्यासाठी विविध पद्धतींचा वापर करण्यासह ‘नॅशनल मेन्टरिंग इन्फ्रास्ट्रक्चर’ची निर्मिती करण्यात येईल. या अभियानाच्या मार्गदर्शक सूचनांचा मसुदा एनसीटीईच्या ‘https://ncte.gov.in/’ या संकेतस्थळावर उपलब्ध करून देण्यात आला आहे. मुसदा जाहीर केल्यापासून तीस दिवसांत त्यावर हरकती-सूचना पाठविण्याचे आवाहन एनसीटीईने केले आहे.