घोडेगाव (पुणे) : गोहे बुद्रूक (ता. आंबेगाव) येथील आदिवासी आश्रमशाळेच्या जुन्या इमारतीत केंद्र सरकारच्या आयुष मंत्रालय व राष्ट्रीय निसर्ग उपचार संस्था यांच्या वतीने निसर्गोपचार रुग्णालय सुरु केले आहे. या रुग्णालयात निसर्गोपचार पद्धतीने उपचार केले जाणार असल्याचे येथील निवासी वैद्यकीय तज्ज्ञ डॉ. शिवकेश कुमारसिंग यांनी सांगितले. 

- पुण्याच्या बातम्या वाचण्यासाठी येथे ► क्लिक करा

गोहे बुद्रूक येथे एकात्मिक आदिवासी विभागाची आश्रमशाळा असून, या इमारतीला डागडुजी व इतर ठिकाणी ४७ लाख रुपये खर्च करून निसर्गोपचार रुग्णालयात रूपांतर केले आहे. या निसर्गोपचार केंद्राचे उद्घाटन शुक्रवारी (ता. २) आयुष मंत्री श्रीपाद नाईक यांच्या हस्ते ऑनलाइन पद्धतीने करण्यात आले. हे रुग्णालय पुणे येथील राष्ट्रीय निसर्गोपचार संस्था चालवणार आहेत. २० बेडची सोय असलेले हे रुग्णालय येथील आदिवासी व सर्वसामान्य नागरिकांना उपयोगाचे ठरणार आहे. संपूर्ण निसर्गोपचार पद्धतीने रुग्णांवर उपचार केले जाणार आहे. त्यासाठी कोणतेही शुल्क आकारले जाणार नाही. 

 

या निसर्गोपचार रुग्णालयात नागरिक सशक्त राहण्यासाठी माती, पाणी, वायु, सूर्यप्रकाश व आकाश या पंचमहाभूतांद्वारे आरोग्याचे ज्ञान दिले जाणार आहे. येथे नैसर्गिक औषधांचाही अभ्यास केला जाणार आहे. येथे दाखल झालेल्या रुग्णांकडून कोणतेही शुल्क घेतले जाणार नसून, त्यांना सर्व प्रकारच्या सुविधा येथे पुरविल्या जाणार आहेत. सध्या येथे कोरोनाच्या पार्श्वभूमीवर कामकाज करण्यास अडथळा येत आहे. परंतु, लवकरच सर्व प्रकारची काळजी घेऊन येथे ही उपचार पद्धती सुरु केली जाणार आहे. 
- डॉ. शिवकेश कुमारसिंग

तर एक नोव्हेंबरपासून मराठा समाज रस्त्यावर उतरेल; विनायक मेटे यांचा इशारा

या आहेत सुविधा 
निसर्गोपचार पद्धतीने उपचार, योग कक्ष, पुरुष व स्त्री स्वतंत्र कक्ष, पुरुष व स्त्री उपचार कक्ष, सल्लामसलत कक्ष, थेरपी कक्ष, आहार केंद्र, २० बेडची सोय.