पुणे : गरजू नाट्यकर्मी आणि कामगारांना आर्थिक मदत देण्यावरून नाट्य परिषद आणि पुण्यातील रंगकर्मींमध्ये वाद सुरू झाला आहे. मदत देताना पुण्याला डावलल्याची भावना केली जात असून, नाट्य निर्माता संघाने नाट्य परिषदेचे विश्वस्त शरद पवार यांना पत्र पाठविले आहे.

- ताज्या बातम्यांसाठी डाऊनलोड करा ई-सकाळचे ऍप

लॉकडाऊनमुळे नाट्यगृहे बंद झाल्यानंतर निर्माते, कलाकार आणि पडद्यामागील कलाकारांपुढे आर्थिक संकट उभे राहिले. त्यांना मदत करण्यासाठी अखिल भारतीय नाट्य परिषदेने नाट्यकर्मी मदत निधी उभा केला. त्यात परिषदेनेही योगदान दिले. सुमारे एक कोटी रुपये यात जमा झाले. पुण्यातील कुणालाही मदत मिळालेली नाही, अशी तक्रार केली जात आहे. 

- पुणे : अखेर लॉकडाऊनच्या दुसऱ्या दिवशी दूध पुरवठा सुरळीत; मात्र...

नाट्य परिषदेच्या पुणे शाखेचे अध्यक्ष मेघराज राजेभोसले म्हणाले, "मुंबईतील काही विशिष्ट लोकांना ही मदत देण्यात आली. पुण्यातील गरजू  कलाकार, लावणी कलाकार आणि कामगार यांना मदत मिळालेली नाही. नाट्य परिषदेचे सभासद असलेल्या कलाकारांना मदतीचा एकही पैसा मिळालेला नाही. त्यांना डावलण्यात आले असून, ही वागणूक अन्यायकारक आहे. त्यामुळेच पुण्यातील नाट्य निर्माता संघाच्या माध्यमातून नाट्य परिषदेचे विश्वस्त शरद पवार यांना पत्र पाठवून मदतीची मागणी केली आहे."

परिषदेकडे गरजू कलाकारांना मदतीची मागणी करूनही मदत देण्यात आली नाही. म्हणून हे पत्र पाठवावे लागले आहे, असे राजेभोसले यांनी स्पष्ट केले. त्यांनी या पत्रात 32 नाट्य आणि लावणी निर्माते, 75 कलाकार आणि 300 कामगार यांची परिस्थिती बिकट आहे. त्यांना परिषदेच्या मातृसंस्थेने मदत केलेली नाही, असे म्हटले आहे.

- दिलासादायक बातमी : पुणे जिल्ह्यात कोरोनावर मात करणाऱ्यांचा टक्का वाढतोय!​

नाट्य परिषदेचे अध्यक्ष प्रसाद कांबळी यांनी हे आरोप फेटाळले आहेत. 'सकाळ'शी बोलताना ते म्हणाले, "नाट्यकर्मी मदत निधीचे आवाहन जुलै महिन्यात केले होते. त्यात कोणत्या संस्थांशी संबंधित कलाकारांना आणि कामगारांना मदत केली जाणार आहे, हे स्पष्ट केले होते. त्या संस्थांकडून आलेल्या यादीतील गरजू व्यक्तींना मदत दिली आहे."

जमा झालेल्या निधीचे वितरण जून महिन्यात करण्यात आले आहे. तोपर्यंत पुण्यातून कुणी मागणी केली नाही. आता महिनाभरानंतर मागणी कशासाठी केली जात आहे? शरद पवार यांना पाठविलेले पत्र हे नाट्य निर्माता संघाच्या लेटरहेडवर आहे. ही संस्था नाट्य परिषदेची घटक संस्था नाही. त्यामुळे त्यांना मदत करता येणार नाही, असे कांबळी यांनी स्पष्ट केले.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)