न्यू हायस्कूलचे उत्कृष्ट सादरीकरण
बार्शी शहर : भगवंत मैदानावरील प्रजासत्ताक दिनाच्या सोहळ्यात विद्यार्थ्यांनी सादर केलेला धबधबा रिझर्व फोर्स कमांडो (आरसीएफ) संचलन प्रकार उपस्थितांचे विशेष आकर्षण ठरला. शिस्तबद्ध हालचाली, आत्मविश्वास आणि प्रभावी मांडणीमुळे परीक्षकांनी विद्यार्थ्यांचे कौतुक केले. स्पर्धेच्या निकालात मुलींच्या गटाने प्रथम क्रमांक पटकावला. या गटाचे नेतृत्व कमांडर सृष्टी गायकवाड हिने केले. मुलांच्या गटाने द्वितीय क्रमांक मिळवला असून त्यांचे नेतृत्व कमांडर सोहम परदेशी याने केले. तसेच विशेष बँड पथक सादरीकरणासाठी न्यू हायस्कूलला प्रथम क्रमांक देण्यात आला. या बँड पथकाचे नेतृत्व अल्फाज पठाण याने केले.

पोदार स्कूलमध्ये प्रजासत्ताक दिन उत्साहात
बार्शी शहर : येथील फिनिक्स पोदार लर्न स्कूलमध्ये ७७ वा प्रजासत्ताक दिन उत्साहात साजरा करण्यात आला. कार्यक्रमाच्या अध्यक्षस्थानी संस्थेच्या अध्यक्षा वैशाली कबाडे होत्या. यावेळी सचिव संदीप बरडे, मुख्याध्यापक रविराज बेलुरे होते. यावेळी वैशाली कबाडे म्हणाल्या, की भारतीय संविधानाने दिलेले स्वातंत्र्य, समता व बंधुता ही मूल्ये विद्यार्थ्यांनी आत्मसात करणे गरजेचे आहे. देशाच्या जडणघडणीत शिक्षणाची भूमिका महत्त्वाची आहे. म्हणूनच विद्यार्थ्यांनी शिक्षणाची कास धरावी, असे आवाहनही त्यांनी केले.