पुणे : राज्यात पुन्हा एकदा लॉकडाउन होणार नाही तर आता ‘अनलॉक’च असेल,' असे शुक्रवारी आरोग्य मंत्री राजेश टोपे यांनी स्पष्ट केले. तर, ‘राज्यात करोनाच्या चाचण्या हव्या त्या प्रमाणात होत नाहीत आणि मृत्यूदर लपवला जातो,’ असा माजी मुख्यमंत्री देवेंद्र फडणवीस यांनी केलेले आरोप खोडून काढताना चाचण्यांच्या आकडेवारीसह स्पष्टीकरण दिले. करोनाची लस येत नाही तोवर, सोशल डिस्टंसिंग, मास्क आणि सॅनिटायजेशन या "एसएमएस' प्रणालीचा अवलंब करूनच जनतेला आयुष्य जगावे लागेल, असेही ते म्हणाले.

आणखी वाचा - पुण्यातल्या मोठ्या संस्थेने चीनी वस्तूंवर बहिष्कार टाकलाय!

पुणे शहरात करोनाचे रुग्ण सातत्याने वाढत असल्याच्या पार्श्वभूमीवर राष्ट्रवादी कॉंग्रेसचे अध्यक्ष शरद पवार व राजेश टोपे यांच्या उपस्थितीत लोकप्रतिनिधींची बैठक आज झाली. या बैठकीनंतर पत्रकारांशी बोलताना टोपे पुन्हा लॉकडाउन होणार नसल्याचे सांगितले. पुणे, मुंबई आणि करोनाचा प्रादुर्भाव वाढत असलेल्या ठिकाणी जुलै महिन्यांपर्यंत पुरतील इतक्‍या बेडची सुविधा करण्यात आली आहे. जुलै महिन्यात आढावा घेऊन पुढील तयारी करण्यात येईल. सध्या करोनाची वाढत चाललेली संख्या हा चिंतेचा विषय नसून मृत्यूदर कमी करणे, यावर आम्ही अधिक भर देत आहोत, असेही ते म्हणाले.

आणखी वाचा - पुण्यातील हा भाग करण्यात येणार सील

दोन दिवसांपूर्वी फडणवीस यांनी पुण्यात पत्रकार परिषद घेऊन आरोप केले होते. त्यावर बोलताना टोपे म्हणाले,"" मुंबई आणि पुण्यात दर एक लाख संख्येमागे होणाऱ्या चाचण्यांची संख्या ही देशामध्ये इतर राज्यांमध्ये होत असलेल्या संख्येपेक्षा सर्वाधिक आहे. त्यामुळे चाचण्या कमी होत आहेत, या आरोपांमध्ये तथ्य नाही. मृत्यूचे आकडे काही प्रमाणात पुढे मागे होत असले तरी सरकारने कोणतीही आकडेवारी लपवलेली नाही. विरोधकांनी मागणी केल्यास त्यांना आकडेवारी देऊ.'' प्रतिबंधित क्षेत्राचा (कन्टेंमेंट झोन) आढावा घेतला तर मुंबई आणि पुण्यात सुरूवातीपासून प्रतिबंधित क्षेत्र असलेल्या परिसरामध्ये आता नवे रुग्ण सापडण्याचा वेग मंदावला आहे. परंतु, राज्याच्या इतर भागात गेल्या काही दिवसांमध्ये झालेल्या नागरिकांच्या स्थलांतरामुळे रुग्ण वाढल्याने रुग्णसंख्येत मोठ्याप्रमाणावर वाढ होत असल्याचे, टोपे यांनी सांगितले.

आणखी वाचा - आळंदी-पंढरपूर महामार्गाचे भूसंपादन होणार!