बारामती : शहरात कोरोना रुग्णांची  संख्या दरदिवशी वाढू लागल्याने आता प्रशासनापुढील चिंताही वाढू लागली आहे. आज बारामतीतील कोरोना रुग्णांचा आकडा 107 पर्यंत जाऊन पोहोचला आहे. गेले दोन दिवस शंभरहून अधिक रुग्ण पॉझिटीव्ह येत असून त्यात शहरातील रुग्णांची संख्या अधिक असल्याने आता नगरपालिकेने उपाययोजना आखण्यास प्रारंभ केला आहे. 

कालच मुख्याधिकारी किरणराज यादव यांनी गुरुवारचा आठवडे बाजार पुढील आदेश होईपर्यंत बंद ठेवण्याचे निर्देश दिले होते, आज त्यांनी शहरातील हॉटेल्स, ढाबे येथे क्षमतेच्या 50 टक्केच ग्राहकांना सेवा देण्याचे आदेश जारी केले. प्रत्येक हॉटेल्समध्ये मास्कशिवाय प्रवेश नाही, सॅनेटायझरचा वापर अनिवार्य, येणा-या प्रत्येक ग्राहकाचे नाव, पत्ता मोबाईल क्रमांक लिहून घेण्याचे बंधन घालण्यात आले आहे. या शिवाय ऑक्सिमीटर व थर्मल स्कॅनिंग गनचाही वापर करण्याचे बंधन घालण्यात आले आहे. लक्षणे आढळणा-या रुग्णाला प्रवेश नाकारण्यासह हॉटेलचे वेळोवेळी निर्जंतुकीकरण करावे असेही यात नमूद केले आहे. 

पुणे : कोरोना विषाणूचं वर्तन बदलतंय?; एकाच कुटुंबातील अनेक व्यक्तींना होतेय लागण

बारामती नगरपालिकेने आता अधिक वेगाने घरोघरी जाऊन सर्वेक्षण सुरु केले आहे. मुख्याधिकारी किरणराज यादव स्वताः या प्रक्रीयेवर लक्ष ठेवून आहेत. दरम्यान सोमवारी (ता. 22) उपविभागीय अधिकारी दादासाहेब कांबळे यांनी त्यांच्या दालनात एक महत्वाची बैठक आयोजित केली असून त्यात काही कठोर निर्णय होण्याची शक्यता वर्तविली जात आहे. बारामतीतील रुग्णसंख्येचा आकडा वाढू लागल्याने आता प्रशासनाकडून काही निर्बध घातले जाण्याची शक्यता वर्तविली जात आहे. लॉकडाऊनचा निर्णय होण्याची शक्यता नसली तरी वेळेवर काही निर्बंध आणले जातील, अशी शक्यता आहे. 

बारामतीची आजची स्थिती...
•    तपासलेले आरटीपीसीआर नमुने  415.
•    एकूण पॉझिटिव्ह-107 
•    शहर-63. ग्रामीण- 44
•    एकूण रूग्णसंख्या-8153
•    एकूण बरे झालेले रुग्ण- 7134
•    एकूण मृत्यू-- 151.

(संपादन : सागर डी. शेलार)