पुणे : कोरोनाचा नवा व्हेरियंट ओमिक्रॉननं आता महाराष्ट्राच्या चिंतेत भर टाकली आहे. कारण डोंबिवलीपाठोपाठ पुणे आणि पिंपरीमध्ये ओमिक्रॉनचे रुग्ण आढळून आले आहेत. त्यामुळं पुणेकरांच्या चिंतेतही भर पडली आहे. यामुळं महाराष्ट्रात ओमिक्रॉनचे एकूण आठ रुग्ण आढळून आले आहेत.

आरोग्य विभागाच्या माहितीनुसार, २४ नोव्हेंबर रोजी नायजेरीयातील लेगॉस शहरातून आपल्या भावाला भेटण्यासाठी आलेली ४४ वर्षीय महिला, तिच्या सोबत आलेल्या दोन मुली आणि पिंपरी-चिंचवड शहरात राहणारा तिचा भाऊ आणि त्याच्या दोन्ही मुली असे एकूण सहा जणांच्या प्रयोगशाळा नमुन्यामध्ये ओमिक्रॉन विषाणू आढळून आल्याचा अहवाल राष्ट्रीय विषाणू विज्ञान संस्थेने रविवारी संध्याकाळी दिला आहे. दरम्यान, पुणे शहरातील ४७ वर्षीय पुरुषाला देखील या नव्या व्हेरियंटचा संसर्ग झाला आहे, अशी माहिती नॅशनल केमिकल लॅबोरेटरीच्या (एनसीएल) अहवालात स्पष्ट झालं आहे. यामुळं महाराष्ट्रातील ओमिक्रॉन विषाणू आढळलेल्या रुग्णआंची संख्या आता आठवर पोहोचली आहे.

नायजेरियाहून आलेल्या महिलेमध्ये आजाराची लक्षण अत्यंत सौम्य असून इतर पाच जणांमध्ये कसलीही लक्षणे आढळून आलेली नाहीत. या सहा जणांपैकी तिघेजण १८ वर्षांखालील असून त्यांनी कोणतीही कोरोनाची लस घेतलेली नाही. उर्वरित तिघांनी लसीचे दोन्ही डोस घेतलेले आहेत. दोघांनी कोविशिल्ड तर एकानं कोव्हॅक्सिन लस घेतली आहे. हे सर्वजण सध्या पिंपरीतील जिजामाता रुग्णालयात उपचार घेत असून त्यांची प्रकृती स्थिर आहे.

दरम्यान, पुणे शहरात ओमिक्रॉन बाधित रुग्ण नेहमीच्या सर्वेक्षणात आढळला असून हा रुग्म १८ ते २५ नोव्हेंबर २०२२१ या काळात फिनलंड येथे गेला होता. २९ तारखेला थोडासा ताप आला म्हणून त्याने चाचणी केली असता तो कोविडबाधित आढळला आहे. या व्यक्तीनं कोविशिल्ड लसीचे दोन्ही डोस घेतले असून सध्या त्याला कोणतीही लक्षण नाहीत, प्रकृतीही स्थिर आहे.