पुणे : भरवस्तीत रात्रीच्या सुमारास एका नागरिकावर धारदार शस्त्राने वार करुन खून केल्याचा धक्कादायक प्रकार घडला आहे. सोसायटीसमोर मित्रांसमवेत गप्पा मारत थांबलेल्या एकावर ओळखीच्या तिघांनी तरुणांनी करुन खून केला. ही घटना शुक्रवारी रात्री पावणे अकरा वाजण्याच्या सुमारास धनकवडी येथे घडला.

रामदास शामराव शिळीमकर असे खून झालेल्या तरुणाचे नाव आहे. याप्रकरणी विकास चव्हाण (वय 44, रा. चव्हाणवाडी, धनकवडी) यांनी सहकारनगर पोलिस ठाण्यात फिर्याद दिली आहे. त्यावरुन ज्ञानेश्‍वर वानखेडे याच्यासह तिघांविरुद्ध खुनाचा गुन्हा दाखल करण्यात आला आहे. 

पोलिसांनी दिलेल्या माहितीनुसार, फिर्यादी चव्हाण हे त्यांचे मित्र रामदास शिळीमकर, सुधीर मांगले व अन्य मित्रांसमवेत शुक्रवारी रात्री पावणे अकरा वाजण्याच्या सुमारास धनकवडीतील योगी सोसायटीच्या प्रवेशद्वाराजवळ गप्पा मारत थांबले होते. त्यावेळी वानखेडे हा त्याच्या साथीदारांसमवेत तेथे आला. त्याने शिळीमकर यांना शिवीगाळ करीत मारहाण करण्यास सुरूवात केली. त्यानंतर वानखेडे याने त्यांच्याकडील धारदार शस्त्राने शिळीमकर यांच्या डोक्‍यावर, छातीवर वार करुन त्यांना गंभीर जखमी केले. त्यानंतर तिघेजण तेथून पळून गेले. दरम्यान, या हल्ल्यामध्ये शिळीमकर यांचा मोठ्या प्रमाणात रक्तस्त्राव झाला. रुग्णालयात दाखल करण्यापुर्वीच त्यांचा मृत्यु झाला.

शिळीमकर यांच्या खुनाचे कारण अद्याप समजू शकले नाही, आरोपींना अटक केल्यानंतर या प्रकरणाचा उलगडा होईल, असे पोलिस निरीक्षक अनिल शेवाळे यांनी सांगितले