पारगाव : लोणी (ता. आंबेगाव) येथील कृषी उत्पन्न बाजार समितीच्या उपबाजारात शेतकर्यांनी विक्रीसाठी आणलेल्या कांद्यास या हंगामातील विक्रमी प्रती १० किलोला २२५ रुपये बाजारभाव मिळाला तर खुल्या मोकळ्या कांद्यास प्रती १० किलोला १६९ रुपये बाजारभाव मिळाला असल्याची माहिती मंचर कृषी उत्पन्न बाजार समितीचे सभापती देवदत्त निकम यांनी दिली.

आंबेगाव तालुक्याचा पूर्व भाग व शिरूर तालुक्यातील पच्छिम भागातील शेतकर्यांना येथील उपबाजारात कांदा विक्रीसाठी आणणे सोयीचे पडत आहे येथे विक्री होणार्या कांद्यास बाजारभावही चांगला मिळत आहे. त्यामुळे येथील कांदा लिलावाला शेतकरी व व्यापाऱ्यांचा चांगला प्रतिसाद मिळत आहे आज येथे एकूण ६११ पिशवी कांदा व दोन ट्रॅक्टर ट्रोली खुला कांद्याची आवक झाली.

एक नंबर गोळा कांद्यास - प्रती १० किलोस २०१ ते २२५

रूपये बाजारभाव मिळाला, दोन नंबर कांद्यास - प्रती १० किलोस १७० ते २०० रूपये, तीन नंबर गोलटी कांद्यास - प्रती १० किलोस १०० ते १४० रूपये व चार नंबर बदला कांद्यास - प्रती १० किलोस ४० ते ७६ रूपये बाजारभाव मिळाला. सभापती देवदत्त निकम यांच्या स्वताच्या शेतातील विक्रीसाठी आलेल्या दोन ट्रॅक्टर ट्रोली खुला कांद्यास प्रती १० किलोस १६९ रुपये बाजारभाव मिळाला. कांदा लिलावामध्ये खरेदीदार व्यापारी मचिंद्र वाळुंज, महेंद्र वाळुंज, ज्ञानेश्वर वाळुंज, दत्तात्रय नरवडे, प्रदीप कोचर, सचिन टेमकर यांनी भाग घेतला तर लिलावाची व्यवस्था उपबजार कार्यालय प्रमुख अशोक राजापरे, गणेश गावडे यांनी पाहिली.