मार्केट यार्ड (पुणे) : पुणे जिल्ह्यात अनेक ठिकाणी पुन्हा लॉकडाउन सुरू झाल्याने तेथून येणारा ग्राहक वर्ग कमी झाला आहे. तसेच विविध भागांत भुईमूग पीक निघण्यास आताच सुरुवात झाली आहे. त्यामुळे सर्व प्रकारचे शेंगदाणे क्विंटलमागे 300 रुपयांनी स्वस्त झाले आहेत. येत्या काळात ते अजूनही स्वस्त होण्याची शक्‍यता मार्केट यार्डातील व्यापाऱ्यांनी वर्तविली. आता किरकोळ बाजारात दर्जानुसार शेंगदाणे 90 ते 120 रुपये किलोप्रमाणे मिळत आहे. 

पुण्यात कोरोना रुग्णांचा २ लाखांचा आकडा होणार क्रॉस​

अधिक महिन्यामुळे नवरात्रोत्सव एक महिना पुढे गेला आहे. या महिन्यात सणवार नसतात. त्याचा काहीसा परिणाम बाजारात जाणवू लागला आहे. हॉटेल, आयटी कंपन्या आणि खाणावळी अजूनही पूर्ण क्षमतेने सुरू झालेल्या नाहीत. ते सुरू झाल्यानंतर शेंगदाण्यांना मागणी वाढेल, असे मार्केट यार्डातील व्यापारी अशोक लोढा यांनी सांगितले. 

ताज्या बातम्यांसाठी डाऊनलोड करा ई-सकाळचे ऍप

सध्या बाजारात कर्नाटक, आंध्रप्रदेश, गुजरातसह विदर्भातून शेंगदाण्यांची आवक सुरू आहे. दररोज बाजार 60-80 टन माल येत आहे. सध्या बाजारात नवीन हंगामातील शेंगदाण्यांची आवक होत आहे. ती हळूहळू वाढत जाणार असल्याचेही लोढा यांनी सांगितले. 

घाऊक बाजारातील भाव (प्रती क्विंटल) 
कर्नाटक घुंगरू : 8000 ते 8500 
जाडा शेंगदाणा : 7800 ते 8200 
स्पॅनिश शेंगदाणा : 9000 ते 9500