पुणे : धायरी फाटा ते धायरी गाव या रस्त्याचे रुंदीकरण अर्धवट असताना तेथे दुभाजक लावल्याने वारंवार अपघात घडत आहेत. यात वाहनांचे लाखो रुपयांचे नुकसान होत आहे. हे दुभाजक लावू नयेत यासाठी विरोध करूनही महापालिका याकडे दुर्लक्ष करत असल्याने हा वेळकाढूपणा नागरिकांच्या जीवावर बेतत आहे.

ताज्या बातम्यासाठी डाऊनलोड करा ई-सकाळचे अॅप

पुण्याच्या बातम्या वाचण्यासाठी येथे क्लिक करा

 
धायरी फाटा ते धायरी या दरम्यान गेल्या अनेक वर्षापासून रस्ता रुंदीकरण सुरू आहे. पण अद्याप पूर्ण जागा ताब्यात आलेली नाही. महापालिकेने तेथील मोठे झाडं काढून टाकली, त्यानंतर काही ठिकाणी जमेलतसा पादचारी मार्ग बांधला आहे. या अडीच ते तीन किलोमीटर दरम्यान ७० गल्ल्या आहेत, रस्ता अरूंद असल्याने तेथे लोखंडी दुभाजक नको अशी मागणी करून ही महापालिकेने दुभाजक लावले, ते सदोष पद्धतीने व मध्यभागी न लावल्याने एका बाजूला रस्ता मोठा तर दुसऱ्या बाजूला छोटा अशी स्थिती आहे. त्यामुळे वाहतूक कोंडीत आणखी भर पडली आहे. या लोखंडी दुभाजकास रिफ्लेक्टर नाहीत व नेव्ही ब्लू रंग लावला असल्याने रात्रीच्या वेळी हे दुभाजक दिसत नाहीत. त्यामुळे दर १०-१५ दिवसाला अपघात होऊन वाहनचालक जखमी होत आहेत, वाहनांचे लाखो रुपयांचे नुकसान होत आहे. याबाबत वारंवार तक्रारी केल्या तरी महापालिका प्रशासन लक्ष देत नाही. 

पहिल्या बायकोचा संशयास्पद मृत्यू, दूसरीचा पैशांसाठी छळ तर तिसरीला

शिवसेनेचे विभाग प्रमुख महेश पोकळे म्हणाले, "आत्तापर्यंत पाच ते सहा अपघात होऊन सर्वसामान्य नागरिकांचे मोठे नुकसान झाले आहे. हे दुभाजक सदोष आहेत, या रस्त्यावर त्यांची गरज नाही पण लाखो रुपये खर्च केले आहेत. याबाबत तक्रारी करून ही सुधारणा केली जात नाही नसल्याने त्याचा फटका नागरिकांना बसत आहे. नागरिकांच्या जीवाला धोका निर्माण केला जात असल्याने अधिकारी व ठेकेदारावर गुन्हा दाखल केला जावा. 

उपअभियंता विठ्ठल इंगवले म्हणाले, "नागरिकांची मागणी होती म्हणून दुभाजक बसवले आहेत. गल्ल्या जास्त असल्याने चार पाच गल्ल्यांसाठी एक पंक्चर ठेवले जाणार होते. पण ते शक्य झाले नाही. रस्त्यावर रिफ्लेक्टर लावले होते, ते निघाल्याने पुन्हा लावण्यात येणार आहेत. तसेच दुभाजकाचा पांढरी निळ्या रंगाऐवजी दुसरा रंग मारण्यात येणार आहे. त्यामुळे दुभाजक दिसतील.