मंचर (पुणे) : दिवसा किंवा रात्री गस्त घालत असताना पोलिस लहान गल्ल्यांमध्ये जातच नाहीत. नेमके तेथेच गुन्हे घडतात, अशा तक्रारी सातत्याने नागरीकांमधून केल्या जातात. यावर मंचर पोलिस ठाण्यातील पोलिस उपनिरीक्षक सोमनाथ पांचाळ यांनी शक्कल लढविली आहे. घरापासून पोलिस ठाणे व मंचर शहरात सायकलवरून गस्त घालण्यास त्यांनी सुरवात केली आहे. सायकलवरून प्रवास करताना लोक त्यांच्याकडे कुतुहलाने पाहतात.

मंचर (ता. आंबेगाव) येथे आंतरराष्ट्रीय दर्जाचे पृथ्वी सायकल विक्री केंद्र सुरु झाले आहे. पांचाळ यांनी शोरूममधून सायकल खरेदी केली. घरातून पोलिस ठाण्यापर्यंत व मंचर शहरात सायकलहूनच त्यांनी फिरण्याचा निर्णय घेतला आहे. ते म्हणाले, '20 ते 25 वर्षापूर्वी पोलिस कर्मचारी व अधिकारी सायकलवरून प्रवास करत होते. पण बदलत्या जीवनशैलीमुळे सर्वजन दुचाकी वाहनाचा वापर करतात. इंधनाचे वाढलेले दर परवडत नाहीत. तसेच व्यायामाकडे दुर्लक्ष होत आहे. त्यामुळे अनेक आजारांना सामोरे जावे लागते. शरीर सुदृढ राहण्यासाठी सायकलचा वापर प्रत्येक पोलिस कर्मचाऱ्याला व अधिकाऱ्याला करणे गरजेचे आहे. कोल्हापूर परिक्षेत्राचे विशेष पोलिस महानिरीक्षक विश्वास नांगरे पाटील सायकलचा वापर करतात. त्यामुळे त्यांची शरीरयष्टी तंदुरस्त आहे. त्यांचाच आदर्श घेऊन मीही जास्तीत जास्त सायकलवरून प्रवास करण्याचा निर्णय घेतलेला आहे. या प्रवासामुळे मन प्रसन्न राहते. गल्ली बोळातही फिरता येते. सामान्य नागरिकांशी थेट संपर्क येतो. नागरिकांनाही आमच्याशी बोलताना दुरावा जाणवत नाही. व्यापारी वर्गातही सायकल वापराबाबत जनजागृती करणार आहे.'