शिरूर (पुणे) : शिरूर तालुक्यातील रांजणगाव एमआयडीसीत कामाचे ठेके मिळविण्यासाठी कारखानदारांना धमकावून दहशत निर्माण करणाऱ्या आणि सामान्य कामगारांवर दादागिरी करून इतर छोटे- मोठे गुन्हे करणाऱ्या सात जणांच्या टोळीला एमआयडीसी पोलिसांनी पुणे व नगर जिल्ह्यातील पाच तालुक्‍यांतून आज तडीपार केले. 

दौंडच्या लेकीने नाव काढलं, नोकरी सांभाळून झाल्या डीवायएसपी

रवींद्र पोपट काळे, काळूराम उर्फ कल्पेश शांताराम डांगे, प्रमोद शांताराम डांगे, वैभव नारायण खिलारे व आस्तिक खंडू बोऱ्हाडे (सर्व रा. सोनेसांगवी, ता. शिरूर), अक्षय दिलीप टेमगिरे (रा. विठ्ठल नगर, शिरूर) व अक्षय उर्फ मुन्ना अंबर पवार (रा. टाकळी हाजी, ता. शिरूर) अशी तडीपारीची कारवाई केलेल्या टोळीतील गुंडांची नावे असून, त्यांनी बेकायदा टोळी करून दमदाटी, दहशतीबरोबरच; एमआयडीसी परिसरात अनेक प्रकारचे गुन्हे केले असल्याचे रांजणगाव एमआयडीसी पोलिस स्टेशनचे पोलिस निरीक्षक सुरेशकुमार राऊत यांनी पत्रकार परिषदेत सांगितले. अनेक गुन्हे दाखल झाल्याने, त्यांच्या तडीपारीचा प्रस्ताव जिल्हा पोलिस अधीक्षक संदीप पाटील यांना पाठवला होता. या प्रस्तावाची तातडीने दखल घेत त्यांनी संबंधितांच्या तडीपारीचे आदेश दिले असल्याचे ते म्हणाले. 

सलून दुकाने सुरू करण्याची परवानगी द्या, अन्यथा...

या टोळीतील तरूणांच्या गुन्हेगारी कारवाया सोनेसांगवी, शिरूर व टाकळी हाजी येथील गेल्या काही दिवसांत वाढल्या होत्या. याबाबत एमआयडीसी पोलिसांनी गंभीर पावले उचलली. अतिरिक्त पोलिस अधीक्षक मिलिंद मोहिते, उपविभागीय पोलिस अधिकारी ऐश्‍वर्या शर्मा व स्थानिक गुन्हे अन्वेशनचे पोलिस निरीक्षक पद्माकर घनवट यांच्या मार्गदर्शनाखाली एमआयडीसीचे सहायक पोलिस निरीक्षक प्रफुल्ल कदम, पोलिस उपनिरीक्षक शुभांगी कुटे; तसेच तुषार पंदारे, चंद्रकांत काळे, प्रफुल्ल भगत, अमोल चव्हाण, किशोर तेलंग, रघुनाथ हाळनोर, मंगेश थिगळे या पोलिस पथकाने गेल्या काही दिवसांत पाळत ठेवून सातही जणांना वेगवेगळ्या ठिकाणी गुन्हे करीत असताना रंगेहाथ पकडले.

द्राक्ष उत्पादक शेतकऱ्यांसाठी अमोल कोल्हे मैदानात 

कोरोनाच्या पार्श्‍वभूमीवर औद्योगिक क्षेत्रात लॉकडाउन असतानाही आर्थिक स्थिती सावरण्यासाठी शासनाने उद्योगधंदे सुरू करण्यास परवानगी दिली आहे. परंतु, काही समाजकंटक, गुंड प्रवृत्तीचे तरुण औद्योगिक क्षेत्रात दहशत माजवितात. कामाचे ठेके मिळविण्यासाठी दादागिरी करतात. अशा टोळ्यांची माहिती घेऊन त्यांच्यावर कठोर कारवाईचे आदेश जिल्हा पोलिस अधीक्षक संदीप पाटील यांनी दिले आहेत. 

पुण्याच्या इतर बातम्या वाचण्यासाठी येथे क्लिक करा 

रांजणगाव एमआयडीसीत ठेकेदारी किंवा इतर कामांसाठी दहशत अथवा इतर गुन्हेगारी स्वरूपाच्या कारवाया केल्यास; तसेच बेकायदा ग्रुप तयार करून दादागिरी केली तर त्यांचे "रेकॉर्ड' तयार केले जाईल. गुन्हेगारी पार्श्‍वभूमी, टोळीबाजांची गय केली जाणार नाही. एमआयडीसीत दादागिरी करणारांची कुंडली तयार करण्याचे आदेशही वरिष्ठ पातळीवरून मिळाले आहेत. 
 - सुरेशकुमार राऊत, 
पोलिस निरीक्षक, रांजणगाव एमआयडीसी पोलिस स्टेशन