पुणे - शहर परिसरात सध्या उन्हाचा (Summer) चटका अधिक जाणवू लागला आहे. पुढील आठवडाभर किमान तापमानात (Temperature) चढ-उतार कायम होण्याची शक्यता हवामान विभागाने (Weather Department) वर्तवली आहे.

गेल्या आठवड्याभरापासून किमान तापमानात सातत्याने होत असलेल्या वाढीनंतर मंगळवारी शहर परिसरातील किमान तापमानात काहीशी घट झाली. शहरात ११.५ अंश सेल्सिअस, तर लोहगाव येथे १३.४ अंश सेल्सिअस इतक्या किमान तापमानाची नोंद झाली. सरासरीच्या तुलनेत किमान तापमानात किंचित घट झाली होती. पुढील दोन दिवस शहरात अंशतः ढगाळ वातावरणाची शक्यता असून कमाल व किमान तापमानात चढ-उतार पाहायला मिळणार आहे.

राज्यात उन्हाचा चटका वाढला असून, थंडी कमी होऊ लागली आहे. दरम्यान विदर्भात काही ठिकाणी अद्याप गारठा कायम आहे. राज्यात अनेक ठिकाणी कमाल तापमान तिशी पार पोहोचले आहे. राज्यात पुढील तीन दिवस ही स्थिती अशीच कायम राहणार असून त्यानंतर किमान तापमानात २ ते ४ अंशांनी वाढ होण्याचा अंदाज हवामानशास्त्र विभागाने दिला.

राज्यात मंगळवारी सकाळपर्यंतच्या २४ तासांमध्ये मध्य महाराष्ट्र, मराठवाड्यातील तुरळक भागात किमान तापमानात सरासरीपेक्षा किंचित वाढ तर विदर्भात काहीशी घट पाहायला मिळाली. राज्यातील सर्वाधिक कमाल तापमान ३४.४ अंश सेल्सिअस कमाल तापमान तर नीचांकी तापमानाची नोंद नाशिक येथे ११.४ अंश सेल्सिअस इतके होते.

बंगालच्या उपसागरात ईशान्येकडून वाहणाऱ्या वाऱ्यांमुळे तमिळनाडू, केरळ लक्षद्वीप बेट समुहावर दोन दिवस हलक्या पावसाची शक्यता आहे. पूर्वेकडून वाहणाऱ्या वाऱ्यामुळे अंदमान बेटांजवळ हवेचा कमी दाबाचा पट्टा असल्याने या भागात तुरळक ठिकाणी जोरदार पावसाची शक्यता आहे. राज्यात पुढील चार दिवस मुख्यतः कोरड्या हवामानाचा अंदाज असून राज्याच्या तापमानातील वाढ कायम राहण्याची शक्यता आहे.