पुणे : खासदार राजीव सातव (MP Rajiv Satav) यांचे पुण्यात रविवारी पहाटे जहांगीर हॉस्पिटलमध्ये निधन झाले. त्यांच्या फुफ्फुसामध्ये मोठ्या प्रमाणावर संसर्ग झाला होता. तसेच त्यांना सेकंडरी न्यूमोनिया आणि मल्टी ऑर्गन फेल्यूअर सिंड्रोम होता, अशी माहिती जहांगीर हॉस्पिटलचे वैद्यकीय संचालक डॉ. सत्यजित गिल (Dr. Satyajeet Gil) यांनी दिली. (Post covid pneumonia to MP Satav Explanation doctor at Jehangir Hospital)

सातव यांची कोरोनाची आरटी-पीसीआर निदान चाचणी रविवारी (ता.९) निगेटिव्ह आली होती. त्यानंतर त्यांचे न्युमोनियासंबंधीचे निदान झाले. दरम्यान, राज्याचे आरोग्यमंत्री राजेश टोपे यांनी सांगितलं होतं की,‘‘सातव यांच्यावर करोना आजारावर उपचार सुरू होते. काही दिवसात त्यांच्या कोरोनाचा रिपोर्ट निगेटिव्ह देखील आला होता. मात्र, त्याचदरम्यान त्यांच्या फुफ्फुसामध्ये मोठ्या प्रमाणावर इन्फेक्शन झाल्याने त्यांची प्रकृती बिघडली. त्यातून ते लवकरात बरे, व्हावे यासाठी डॉक्टरांनी शर्थीचे प्रयत्न केले. मात्र आज पहाटे पाच वाजण्याच्या सुमारास निधन झालं’’ सातव यांना याच काळात सायटोमॅजिलो या विषाणूचा संसर्ग झाल्याचेही टोपे यांनी माध्यमांना सांगितलं होतं.

सायटोमॅजिलो विषाणू काय आहे?

डीएनए प्रकारातील हा विषाणू सर्वसाधारण लोकांमध्ये आढळतो. शरीरातील रोगप्रतिकारशक्ती कमी झालेल्या व्यक्तीमध्ये याचे परिणाम जाणवू लागतात. अमेरिकेमध्ये ४० वर्ष पूर्ण झालेल्या जवळपास निम्याहून अधिक व्यक्तींच्या शरिरात हा विषाणू आढळून येतो. लाळ किंवा शरीरातील इतर द्रवाच्या माध्यमातून हा प्रसरतो. सायटॉमॅजिलो हा विषाणू लहान मुले आणि गरोदर महिलांमध्येही आढळून येतो.

सायटोमॅजिलोचा प्रसार, लक्षणं आणि निदान

सायटोमॅझिलो विषाणूचा प्रसार बाधित व्यक्तीची लाळ, थुंकी, रक्त, मूत्र, मातेच्या दुधातून होतो. तर डोकेदुखी, श्वास घेताना अडचण, ताप, सुजलेल्या ग्रंथी अशी याची लक्षण आहेत. रक्ताच्या चाचणीद्वारे या विषाणूचा शरिरातील अस्तित्वाचा शोध घेता येतो.