पुणे : पुणेकरांनो, तुम्हाला 5000 रुपये बक्षीस म्हणुन मिळू शकतात, पण त्यासाठी तुम्हाला चोरीला गेलेला बस स्टॉप शोधायचा आहे. तुम्ही जबरी चोरी, दागिने चोरी, पाकीट चोरी, पैसे चोरी गेल्याच्या अनेक घटना ऐकल्या असतील पण, कधी बस स्टॉप चोरीला गेल्याचे ऐकले आहे का? नाही ना! विश्वास बसत नाही पण हे सत्य आहे. पुण्यात सध्या या अजब चोरीची जोरात चर्चा सुरु आहे.

बीटी कवडे रस्त्यावरील देवकी पॅलेससमोरील बस स्टॉप चोरीला गेल्याचा दावा करणारे पोस्टर पुण्यात झळकत आहे. विशेष म्हणजे, बस स्टॉप शोधणाऱ्याला 5 हजार रुपयांचे बक्षिस देणार असल्याचा दावा या पोस्टरवर केला आहे.
 

reddit युजर सुधाकर यांनी हा फोटो सोशल मिडियावर शेअर केला. त्यांच्या हा फोटो सोशल मिडियावर तुफान व्हायरल झाला असून काही नेटकरी कमेंट करुन फोटो शेअर करत आहे. काहींनी याकडे गमंतीने पाहीले तर काहीनी राग व्यक्त केला आहे. हे पोस्टर राष्ट्रवादीचे नगरसेवक प्रशांत मस्के यांनी लावल्याचे व्हायरल फोटोमधून समजते आहे.