टाकवे बुद्रुक - मावळ तालुक्‍यातील गेल्या काही वर्षांपासून वाढत असलेल्या कुक्कुटपालन व्यवसायाला कोरोना व्हायरसमुळे खीळ बसली आहे. चिकनमुळे हा आजार होत असल्याच्या पोस्ट छायाचित्रासह सोशल मीडियावर व्हायरल होत असल्याने पोल्ट्री व्यवसाय आर्थिक संकटात आला आहे.

ताज्या बातम्यांसाठी डाऊनलोड करा ई-सकाळचे ऍप 

मावळात ४६२ पोल्ट्री फार्म आहेत. त्यातील काही बहुतेक कुक्कुटपालन व्यावसायिक स्वतः पिल्ले विकत घेऊन ती मोठी करून विकतात तर काही वेंकिज, दुर्वेश, सुगुना, जम्बो, प्रीमिअर यांसारख्या कंपन्या जोडल्या आहेत. या कंपन्या कुक्कुटपालन व्यावसायिकांना पिल्ले आणून देते. त्यांचे खाद्य व औषधे पुरवतात. कोंबड्या ४५ दिवसांमध्ये दोन किलोपर्यंत झाल्यानंतर त्या घेऊन जातात. मात्र, एक ते दीड महिन्यापासून कोरोना व्हायरस हा चिकनमुळे होतो, अशा अफवा सुरू झाल्यानंतर खाणाऱ्यांनी त्याचा धसका घेतला आहे. कंपन्या व कोंबड्या विकणारे व्यावसायिक चिकनच्या दुकानात ८० ते ८५ किलो भावाने कोंबड्या विकत होते. आता त्या ३५ ते ४० किलो भावाने द्याव्या लागत आहे. त्यामुळे चिकनच्या भावात किलोमागे ४० ते ४५ रुपयांची घट झाली आहे. त्यामुळे कंपन्या तोट्यात चालल्या आहेत. तसेच शेतकरी व्यावसायिकही अडचणीत आले आहेत.

Coronavirus : इराणमधील भारतीय म्हणतात, 'आम्हाला वाचवा ओ'

नाणोलीतील व्यावसायिक एकनाथ वाडेकर म्हणाले, ‘‘काही वर्षांपूर्वी बर्ड-फ्लूमुळेमुळे कुक्कुटपालन व्यावसायिक आर्थिक संकटात सापडला होता. आता त्याची पुनरावृत्ती टाळण्यासाठी सरकारने याबाबत जनजागृती करण्याची आवश्‍यकता आहे.’’
चिखलीतील दुर्वेश चिकन कंपनीचे व्यवस्थापक सचिन कामठे म्हणाले, ‘‘कोरोनाच्या अफवेमुळे चिकणमध्ये निम्म्याने तोटा सहन करावा लागत आहे.’’

सोशल मीडियामुळे परिणाम
सोशल मीडियाच्या माध्यमातून पसरविल्या जाणाऱ्या अफवांमुळे या व्यावसायिकांवर विपरीत परिणाम झाला आहे. येत्या काही दिवसांत हे चित्र सावरले नाही, तर हा व्यवसाय तग धरू शकणार नाही. त्यामुळे पशुसंवर्धन विभागाने व आरोग्य विभागाने जनजागृती करणे गरजेचे आहे, अशी मागणी कुक्कुटपालन व्यावसायिकांकडून होत आहे.