पुणे - विद्यापीठातील शिक्षकेतर कर्मचारी, अधिकाऱ्यांनी विविध मागण्यांसाठी गुरुवार (ता. 1) पासून बेमुदत काम बंद आंदोलन करण्याचे जाहीर केले आहे. मात्र, सावित्रीबाई फुले पुणे विद्यापीठाच्या परीक्षा विभागात अंतिम वर्षाच्या परीक्षेची तयारी सुरू असताना आक्रमक झालेल्या कर्मचाऱ्यांनी आजच (बुधवारी) काम बंद पाडून, अधिकारी व कर्मचाऱ्यांना कार्यालयातून बाहेर पडण्यास भाग पाडले.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

महाराष्ट्रातील 13 अकृषी विद्यापीठातील कर्मचारी, अधिकारी यांना सातवा वेतन आयोग लागू करावा, आश्वासित प्रगती योजना पुन्हा सुरू करावी, विद्यापीठ, महाविद्यालयातील रिक्त पदे भरावीत, पाच दिवसांचा आठवडा लागू करा यासह 10 मागण्यांसाठी विद्यापीठ कर्मचाऱ्यांनी 24 सप्टेंबर पासून लेखणी बंद आंदोलन सुरू केले आहे. आंदोलनावर तोडगा काढण्यासाठी उच्च व तंत्र शिक्षण मंत्री उदय सामंत यांनी अकृषी विद्यापीठातील व महाविद्यालयीन शिक्षकेतर संघटनेच्या पदाधिकाऱ्यांसोबत ऑनलाइन बैठक घेतली, पण त्यात तोडगा निघाला नाही. दरम्यान या बैठकीचे इतिवृत्त काढले असून त्यातील आश्‍वासनांवर कर्मचारी समाधानी नाहीत, त्यामुळे बुधवारी संघटनेचे पदाधिकारी आक्रमक झाले.

जमिनीच्या सुनावणीला जमीन मालकांचीच गैरहजेरी; लवाद खोत यांची माहिती

गुरुवार पासून बेमुदत आंदोलन सुरू होणार असताना त्याच्या एक दिवस आधीच संघटनेच्या पदाधिकाऱ्यांनी व सदस्यांनी परीक्षा विभागात जाऊन सर्वांना बाहेर पडण्याचे आवाहन केले. दुपारनंतर काही अधिकारी पुन्हा कामासाठी आत गेले असता, त्यांना पुन्हा काम न करता बाहेर पडण्यास सांगण्यात आल्याने आज दिवसभरात काहीच काम होऊ शकले नाही.

चारित्र्याचा संशय; नव्या नवरीने तीन महिन्यांतच केली आत्महत्या

'गेल्या आठवड्यात शिक्षकेतर कर्मचारी, अधिकाऱ्यांनी लेखणी बंद आंदोलन केले, पण आता उद्यापासून विद्यापीठातील एकाही विभागाचे कुलूप देखील उघडले जाणार नाही. आमचे काम आंदोलन किती दिवस चालवायचे हे सरकारच्या भूमिकेवर आवबंलून आहे.''
- डॉ. सुनील धिवार म्हणाले, उपाध्यक्ष, पुणे विद्यापीठ शिक्षकेतर सेवक कृती समिती

संजीव धुरंधर यांचा सन्मान; अमेरिकन फिजिकल सोसायटीचे फेलो म्हणून निवड

कुलगुरूंनी घेतला परीक्षेचा आढावा
अंतिम वर्षाच्या परीक्षेचे काम लवकर संपवून वेळापत्रक जाहीर करण्याचा विद्यापीठाचा प्रयत्न आहे. त्याच पार्श्‍वभूमीवर कुलगुरू डॉ. नितीन करकळमकर यांनी परीक्षा विभागाला भेट दिली. प्र- कुलगुरू डॉ. एन. एस. उमराणी, कुलसचिव डॉ. प्रफुल्ल पवार हे देखील यावेळी उपस्थित होते. परीक्षा मंडळाचे संचालक डॉ. महेश काकडे यांनी तयारीची माहिती दिली.

अजित दादा काढणार तोडगा ?
उदय सामंत यांनी बैठक घेऊन कोणताही तोडगा निघाला नाही, त्यानंतर आता बेमुदत आंदोलन सुरू होणार आहे. त्यामुळे गुरुवारी सकाळी उपमुख्यमंत्री अजित पवार यांच्याकडे कर्मचारी संघटनेच्या पदाधिकाऱ्यांची मुंबईत बैठक होणार आहे. बहुतांशी प्रश्‍न वित्त विभागाशी संबंधित असल्याने अजित पवार यात थेट निर्णयही घेऊ शकतील, त्यामुळे आंदोलनावर तोडगा निघणार का याकडे लक्ष लागले आहे.

Edited By - Prashant Patil