कॅन्टोन्मेंट - पुणे कँटोन्मेंट बोर्डाचा कमेला कोंढवा येथील कत्तलखाना कायमस्वरूपी बंद केल्याने लष्कर भागातील खाटिक व्यावसायिकांनी आज बोर्ड कार्यालयात आंदोलन केले. कॅम्प येथील छत्रपती शिवाजी मार्केट येथे खाटीक व्यावसायिकांचे मोठ्या प्रमाणात मटन मार्केट आहे.

यावेळी जनावरांची काटाई करण्याकरिता मागील १२५ वर्षाहून जास्त कालावधीपासून कोंढवा येथे कत्तलखाना सुरू आहे. यावेळी हा कत्तलखाना बंद करून पुणे महपालिकेच्या कत्तलखान्यात कँटोन्मेंटच्या व्यवसायिकांकरिता सोय करावी अशा आशयाचे विनंती पत्र नुकतेच बोर्डाचे सीईओ सुब्रत पाल यांनी महापालिका आरोग्य विभागाचे आयुक्त आशिष भारती यांना दिले होते.

या पत्राला अनुसरून महापालिका आयुक्तांनी  २५ एप्रिल रोजी ठराव मान्य करून यामध्ये महापालिकेच्या जनावरांची कटाई झाल्यानंतर कॅन्टोन्मेंटच्या जनावरांची काटाई करण्याची अनुमती दिली होती. स्थायी समितीच्या ठरावात मोठ्या जनावरांसाठी प्रत्येकी ८० रुपये तर लहान प्रत्येकी दोन जनावरांसाठी  ३० रुपये प्रमाणे दर निश्चित करण्यात आले.

तसेच त्या जनावरांची घेऊन जाण्याची जबाबदारी ही कँटोन्मेट बोर्डाची राहिल असे पत्रक बोर्डाला मनपाने पाठवले होते. त्यानुसार बोर्डाच्या बैठकीत याबाबत प्रस्ताव पारित करून सीईओ पाल यांनी जनावरांची वाहतूक करण्याची जबाबदारी खाटिक व्यावसायिकांची राहील आणि व्यावसायिकाने पालिकेला ठरलेल्या दर द्यावा अशा आशयाचा अध्यादेश काढला होता.

मात्र या बोर्डाच्या निर्णयाला खाटिक व्यावसायिकांनी विरोध दर्शवला आहे. यावेळी ऑल इंडिया जमियतुल कुरेश ॲक्शन कमिटीचे शहर अध्यक्ष हसन कुरेशी म्हणाले की, मनपाचे दर आम्हाला परवडणारे नाही, कत्तलखाना बंद करणे म्हणजे आमच्या नैसर्गिक न्याय तत्वाची पायमल्ली असुन त्याचप्रमाणे भारतीय संविधानाने भारताचे नागरिक म्हणुन आम्हाला बहाल केले आहे.

या निर्णयाविरूध्द आम्ही सदर व्यवसायाशी निगडीत असणारी सर्व मंडळी यांनी सनदशीर मार्गने न्याय मिळवण्याकरिता जिल्हा व सत्र न्यायालयात अर्ज दाखल केला आहे. त्यामुळे, सदरचे प्रकरण हे आज रोजी न्यायप्रविष्ठ असल्याकारणाने हे प्रकरण निकाली निघण्याअगोदर, कत्तलखाना बंद करणे हे न्यायाला धरून नाही.

त्यामुळे कत्तलखाना परस्पर बंद करण्याचा घेतलेला निर्णय त्वरीत मागे घ्यावा, अन्यथा सनदरशीर व कायदेशीर मार्गाने लोकशाहीला अभिप्रेत असणान्या तत्वानुसार तीव्र आंदोलन करू, असा इशारा कमिटीने पत्रकाद्वारे दिला आहे.

यावेळी कमिटीचे पश्चिम महाराष्ट्र अध्यक्ष सादिक कुरेशी, पुणे शहर अध्यक्ष हसन कुरेशी, उपाध्यक्ष. आरिफ कुरेशी, सेक्रेटरी. महमूदलाल कुरेशी, मुनव्वर कुरेशी, आरिफ चौधरी, अनिस कुरेशी, हाजी इकबाल कुरेशी, हाजी इर्शाद पटेल, इरफान कुरेशी, हाजी बिलाल कुरेशी, आबू सुफियान कुरेशी, हाजी मईनुद्दीन कुरेशी, हाजी अबरार कुरेशी, फारुख कुरेशी आदी आंदोलन प्रसंगी उपस्थित होते.