शिरूर - हवेलीचे आमदार ॲड. अशोक पवार यांच्या जिविताबद्दल, एका निनावी पत्रादवारे आक्षेपार्ह टिपण्णी करून दिलेल्या धमकीचा निषेध नोंदवितानाच; शिरूर शहरातील सत्तांतर्गत संघर्षाचा हा परिपाक असल्याचा थेट आरोप शिरूर तालुका शिवसेनेने केला आहे. याबाबत निर्माण झालेले संशयाचे मळभ दूर व्हावेत यासाठी तातडीने या प्रकाराचा शोध लावावा, अशी आग्रही मागणी शिवसेनेचे तालुकाप्रमुख सुधीर फराटे यांनी केली आहे.

या प्रकरणाच्या तपासासाठी येत्या पाच दिवसांचा 'अल्टीमेटम' दिला जात आहे. त्या मुदतीत या निनावी पत्राचा बोलविता धनी न सापडल्यास शिरूर पोलिस ठाण्यासमोर उपोषण आंदोलन करण्याचा इशारा फराटे यांनी आज येथे पत्रकार परिषदेत दिला. शिवसेनेचे जिल्हा सल्लागार अनिल काशीद, उपजिल्हाप्रमुख पोपट शेलार, तालुका संघटक कैलास भोसले, युवासेनेचे तालुका अधिकारी सुनिल जाधव, शिवसेना ग्राहक संरक्षण कक्षाचे तालुकाध्यक्ष अनिल पवार आदी यावेळी उपस्थित होते. निनावी पत्रातील मजकूर पडताळून पाहील्यास पत्रलेखक असलेली व्यक्ती उद्योजक प्रकाश धारिवाल परिवाराची व त्यांच्या नेतृत्वाखालील शिरूर शहर विकास आघाडीची हिंतचिंतक असल्याचे दिसत आहे, असा आरोप फराटे यांनी केला.

ते म्हणाले, "स्व. रसिकभाऊ धारिवाल, स्व. शहिदखान पठाण, स्व. किसनभाऊ बरमेचा; यांच्यासह माजी खासदार शिवाजीराव आढळराव पाटील, माजी आमदार बाबूराव पाचर्णे, पोपटराव गावडे व उद्योजक प्रकाश धारिवाल यांचा शिरूर शहराच्या विकासात मोलाचा सहभाग असूनही या नेत्यांनी शहरातील सामाजिक सलोखा कायम ठेवण्यात राजकारणविरहीत प्रयत्न केलेले आहेत. मात्र, आमदार पवार व त्यांच्या परिवाराचा आगामी नगर परिषद निवडणूकीच्या निमीत्ताने शहराच्या राजकारणात हस्तक्षेप वाढला असून, तो पत्रलेखकाला मान्य नसल्याचे निनावी पत्रातील मजकूरातून दिसून येते. तेव्हा आमदारांनीही या पत्रातून आत्मचिंतन करावे व हस्तक्षेप होत असल्यास तो थांबवावा.

शिरूर शहरात व एमआयडीसी मध्ये काम, व्यवसाय करणा-या तरूणांना सत्तेचा वापर करून व्यक्तीगत त्रास देण्याचे काम आमदार व त्यांच्या नातेवाईकांकडून चालू असल्याचे पत्रात नमूद केले असून, ते खरे असेल तर आमदारांनी हे देखील टाळले पाहिजे." विकासकामे केली म्हणून धमकी दिल्याचा अपप्रचार आमदार व त्यांचे समर्थक करीत असून, हा अजब तर्क असल्याचा टोला फराटे यांनी लगावला. या पार्श्वभूमीवर आमदारांनी विचार करावा व कुटूंबिय व नातेवाईकांना इतरांच्या कारभारात हस्तक्षेप करण्यापासून रोखावे, नगरपरिषदेत नगराध्यक्ष व नगरसेवक सक्षमपणे काम करीत असताना आमदारांच्या सौभाग्यवती हस्तक्षेप करतात हे न समजण्यासारखे आहे. पत्रातील मजकूराचा खुलासा करण्याची जबाबदारी आमदारांची असून, पंचायत समितीचे बीओटीवरील कॉम्प्लेक्स, एसटी स्थानकाच्या विकासाचे बीओटी वर चालू असलेले काम, टपरीधारकांचे पुनर्वसन, शहरातील पाबळ फाटा व कुकडी कॉलनीच्या जागेवर डोळा यासंदर्भात निनावी पत्रातून झालेल्या गंभीर आरोपांवरून आमदारांविषयी संशयाचे मळभ दाटले असल्याने त्यांनी खुलासा करावा, अशी आग्रही मागणीही फराटे यांनी केली.

आगामी घोडगंगा साखर कारखाना, नगर परिषद, जिल्हा परिषद व पंचायत समिती निवडणूकांना सामोरे जाताना दोन वर्षांत सत्ताधारी आमदार म्हणून कोणतेही विशेष काम झालेले नाही व कारखान्याच्या अध्यक्षपदाची सूत्रे दीर्घकाळ हाती असूनही घोडगंगा कारखाना त्यांना सुस्थितीतीत आणता आला नाही. हे अपयश झाकण्यासाठी व सहानुभूती मिळविण्यासाठी हा राजकीय 'स्टंट' तर नाही ना, अशी शंकाही फराटे यांनी उपस्थित केली. निनावी पत्राच्या मागील व्यक्तीला शोधताना त्या पत्रातील आरोपांबाबत पुरावा देऊन मुद्देसूद खुलासा करावा व सत्यस्थिती जनतेसमोर आणावी, अशी आग्रही मागणी त्यांनी केली.