पुणे : कोरोनाच्या तिसऱ्या लाटेचा इशारा केंद्र शासनाने दिलेला असताना कोरोनाच्या प्रतिबंधासाठी महापालिकेच्या पायाभूत सुविधांचा आढावा महापालिका आयुक्त विक्रम कुमार यांनी आज (ता. ३०) घेतला. रुग्णालये, ऑक्सिजन प्लांट यांची उर्वरित कामे गतीने पूर्ण करा. अशा सूचना प्रशासनाला दिल्या आहेत.

कोरोनाच्या दुसऱ्या लाटेत शहरात एका दिवसात सात हजार रुग्ण आढळले होते, त्यावेळी शहरातील खासगी तसेच महापालिकेच्या सर्व रुग्णालयात बेड, ऑक्सिजन बेड उपलब्ध नसल्याने गंभीर स्थिती निर्माण झाली होती. त्यातच ऑक्सिजनचा तुटवडा कमी झाल्याने आणीबाणीची होती. रुग्णांना योग्य पद्धतीने उपचार देऊन त्यांचे प्राण वाचविण्यासाठी प्रशासनाची चांगलीच दमछाक झालेली होती.

केंद्र शासनाने कोरोनाच्या तिसऱ्या लाटेचा इशारा दिला आहे, त्यासाठी शहरातील सुविधा सज्ज ठेवाव्या लागणार आहेत. याकडे महापालिका प्रशासनाने आज आढावा बैठक घेतली. राजीव गांधी रुग्णालय, अण्णासाहेब मगर रुग्णालय येथील कामाचा आढावा आयुक्तांनी घेतला व उर्वरित कामे गतीने पूर्ण करा असे सांगण्यात आले.

लहान मुलांची काळजी घ्यावी, त्यासाठी नागरिकांमध्ये जनजागृती करावी, महापालिकेच्या ऑक्सिजन प्लांटचे काम पूर्ण करा, ज्या भागात रुग्णसंख्या वाढत आहे तेथे कोरोनाची चाचणी करण्याचे प्रमाण वाढवा अशा सूचना आयुक्तांनी दिल्या आहेत. तसेच रुग्णसंख्या वाढत गेल्यास सीओईपी जम्बो रुग्णालय सुरू करण्याचा विचार केला जाईल, असे अतिरिक्त आयुक्त रवींद्र बिनवडे यांनी सांगितले.