पुणे : शहरातून अन्य शहरांत विमानाने जाण्यासाठी १६ ऑक्टोबरपासून लोहगाव विमानतळ बंद असला तरी, मुंबईला जाण्यासाठी शहरातून हेलिकॉप्टरची सेवा प्रवाशांना उपलब्ध झाली आहे. अर्थातच त्यासाठी पैसे थोडे जास्त मोजावे लागणार आहे.

लोहगाव विमानतळ १६ ते २९ ऑक्टोबर दरम्यान बंद राहणार आहे. त्यामुळे पुण्यापासून तब्बल २५ हून अधिक शहरांशी एअर कनेक्टिव्हिटी तुटणार आहे. त्यामुळे विशेषतः उद्योजक, नोकरदार, पर्यटक आणि विद्यार्थ्यांची गैरसोय होणार आहे. या पार्श्वभूमीवर पुण्यातून हेलिकॉप्टर सेवा सुरू झाली आहे. खराडी येथून हे हेलिकॉप्टर सकाळी ९ वाजून ३० मिनिटांनी सुटेल.

मुंबईत जुहू येथे ४५ मिनिटांत ते पोचेल. तर मुंबईहून ४ वाजून ३० मिनिटांनी हे हेलिकॉप्टर निघून पुण्यात पोचेल. तसेच मुंबईतून सकाळी १० वाजून ३० मिनिटांनी हेलिकॉप्टर पुण्यासाठी निघेल. ते हेलिकॉप्टर दुपारी ३ वाजून ३० मिनिटांनी पुण्यातून मुंबईला निघेल. या हेलिकॉप्टरमध्ये एकाचवेळी ५ प्रवासी प्रवास करू शकतील. प्रवाशाने रिटर्न तिकिट बुक केले तर ते २९ हजार ५०० रुपयांना असेल. एका बाजूचे तिकिट १५ हजार ५०० रुपये असेल. ब्लेड इंडियाच्या संकेतस्थळावर या बाबतचे अधिक तपशील प्रवाशांना उपलब्ध होतील.