Pune autorickshaw drivers strike: पुण्यातील रिक्षाचालकांनी आज पुन्हा एकदा बंदची हाक दिली. त्यामुळे पुणेकरांचे आज भलते हाल झाले. काही दिवसांपूर्वी देखील पुण्यातील रिक्षाचालकांनी आक्रमक धोरण अवलंबून काही करुन सरकारनं आपल्या मागण्या पूर्ण कराव्यात म्हणून एल्गार पुकारला होता.

बाईक टॅक्सी आणि अनधिकृत वाहतुकीच्या विरोधात सकाळी ११ वाजल्यापासून रिक्षा चालकांनी आरटीओ कार्यालयासमोर आंदोलन केलं. संचेती हॉस्पिटलपासून पुणे रेल्वे स्टेशनकडे जाणारा रस्ता देखील बंद होता. जुना बाजार चौकतून आरटीओ कार्यालयाकडे जाणारा रस्ता आणि जहांगीर हॉस्पिटल चौकापासून संचेती हॉस्पिटलकडे जाणारा रस्ता बंद झाल्यानं मोठी गोंधळाची परिस्थिती निर्माण झाली होती.

हेही वाचाः सीमावादात रक्त सांडायला मराठी माणूसच का?

हे आंदोलन आणखी चिघळण्याची शक्यता असल्याने पोलिस प्रशासनाने स्पेशल पोलिस फोर्स बोलावलं आहे. यामध्ये दंगल नियंत्रक पथकालाही पाचारण करण्यात आलेलं आहे. पोलिस आंदोलकांना वारंवार समजवण्याचा प्रयत्न करीत आहेत. मात्र आंदोलक आपल्या भूमिकेवर ठाम आहेत.

दरम्यान, आज दुपारी रिक्षा चालक रिक्षा रस्त्यावर सोडून घरी निघून गेल्याने आणखी गोंधळाची परिस्थिती निर्माण झाली होती. रिक्षाचालक हे अजूनही त्यांच्या भूमिकेवर ठाम असल्याचे दिसून येत आहे. सध्या स्वतः पोलिस रस्त्यावरील रिक्षा बाजूला नेत वाहतूक सुरळीत करण्याचा प्रयत्न करीत आहेत.