बिबवेवाडी - कात्रज ते स्वारगेट बीआरटी मार्ग सुरू होण्यासाठी अनेक राजकीय पक्षांनी आंदोलने करून व महापालिकेतील सत्ताधारी पक्षाने प्रयत्न करून काही महिन्यांपूर्वी कात्रज ते स्वारगेट बीआरटी मार्ग सुरु केला, सुरवातीच्या काळात बीआरटी मार्गातील प्रत्येक चौकात, बस थांब्यावर पीएमपीएल चे कर्मचारी उपस्थित राहून मार्गातील वाहतूक व्यवस्था पहात होते. त्यामुळे बीआरटी मार्गातील वाहतूक सुरळीत चालू होती. परंतु. पीएमपीएल बसच्या चालकांनी सर्व नियमांना फाटा देत आपल्या मर्जीप्रमाणे बस चालवून सुसंस्कृत पुण्याचे दर्शन घडविण्याचे काम दररोज करत आहेत. त्यासाठी त्यांच्यात शर्यत लागल्याचे चित्र सातारा रस्त्यावर नेहमी पाहायला मिळत असून वाहतूक पोलीस आपली कार्यक्षमता दाखवून देत आहे.

कात्रज ते स्वारगेट दरम्यान पीएमपीएल चे अकरा बस थांवे असून आठ चौक आहेत, अनेकवेळा सिग्नलला चौकातून पुढे जाण्याच्या प्रयत्नात अपघात झाले असून नागरीक गंभीर जखमी झाले आहेत.

वाहतूक सिग्नलला झेब्रा क्रॉसिंगवर वाहने थांबल्यास वाहतूक पोलीस दंडात्मक कारवाई करतात मग वाहतूक नियमांचे उल्लंघन करणाऱ्या पीएमपीएल बसवर कारवाई करणार का असा प्रश्न नागरीकांनी उपस्थित केला आहे.

शफील पठाण (वरिष्ठ पोलीस निरीक्षक, सहकारनगर वाहतूक विभाग) - नियमभंग करणाऱ्या वाहनांवर कारवाई करण्यात येत असून, बीआरटी मार्गात वाहतुकीचे नियम न पाळणाऱ्या वाहनांवर कारवाई करण्यात येणार आहे.

अभिजित टेंबेकर (नागरीक) - बीआरटी मार्गात अनेकवेळा अपघात झाले आहेत, पीएमपीएल बस चे चालक अनेक वेळा नियम धाब्यावर बसवून बस चालवतात त्यामुळे अपघातांना निमंत्रण मिळते.