पुणे, ता. २१ : भरधाव ट्रॅव्हल्स बसने समोरून येणाऱ्या सहा वाहनांना धडक दिल्यामुळे झालेल्या विचित्र अपघातात एकाचा जागीच मृत्यू झाला. तर, अन्य पाचजण गंभीर जखमी झाले आहेत. त्यापैकी एका महिलेची प्रकृती चिंताजनक आहे. ही घटना उंड्री परिसरातील एनआयबीएम ते कडनगर रस्त्यावर रविवारी रात्री सव्वासात वाजता घडली.

या अपघातात प्रशांत भानुदास घेमुड (वय ३७, रा. बधेनगर, कोंढवा खुर्द) या दुचाकीस्वाराचा जागीच मृत्यू झाला. रिक्षाचालक मधू कुवर, रिक्षातील प्रवासी अलिस्टर मर्चंट, मालवाहतूक टेम्पोमधील इस्माईल सय्यद, रफिक देशमुख (रा. लेन क्रमांक ३, सय्यदनगर, हडपसर) हे चौघे गंभीर जखमी झाले. एका महिलेची प्रकृती चिंताजनक आहे. त्यांच्यावर ससून आणि खासगी रुग्णालयात उपचार सुरू आहेत.

कोंढवा पोलिसांनी बसचालक आरोपी मैनुद्दीन मेहबूब शेख (वय ४२, रा. नाना पेठ, कॅम्प चौक, पुणे) याला ताब्यात घेतले आहे.

वरिष्ठ पोलिस निरीक्षक संतोष सोनवणे यांनी दिलेल्या माहितीनुसार, एनआयबीएम ते कडनगर रस्त्यावर ऑर्किड पॅलेससमोरील उतारावर वाय जंक्शनजवळ बसचा (क्रमांक एमएच १२- एचबी ०२४२) ब्रेक फेल झाला. त्यामुळे ही बस उतारावरून भरधाव सुटली. बसने समोरून येणाऱ्या सहा वाहनांना धडक दिली, त्यात एका दुचाकीस्वाराचा जागीच मृत्यू झाला. अन्य जखमींवर ससून आणि खासगी रुग्णालयात उपचार सुरू आहेत.

या अपघातात तीन मोटारींसह टेम्पो, रिक्षा आणि एका दुचाकीचे मोठे नुकसान झाले आहे. मोहसीन शेख (रा. जुना मोदीखाना, कॅम्प), निखिल बक्षी (रा. न्याती ऑपिटल सोसायटी) आणि राजेश जेडीपाल (रा. रहेजा विस्टा सोसायटी) यांच्या मोटारीचे नुकसान झाले आहे. जेडीपाल हेही किरकोळ जखमी झाले आहेत.