पुणे - दोन महिन्यांच्या प्रतीक्षेनंतर सुरू झालेली दुकाने... (Shops) खरेदीसाठी (Purchasing) उसळलेली गर्दी, (Crowd) त्यातच महापालिकेकडून सुरू असलेल्या रस्त्यांची कामे (Road Work) आणि त्यामुळे जागोजागी झालेली वाहतूक कोंडी (Traffic) असे चित्र मंगळवारी शहरात सर्वत्र पहावयास मिळाले. दिवस जसा उगवला अन्‌ घड्याळाचे काटे पुढे सरकत होते, तशी गर्दी वाढतच होती. दोन वाजले अन्‌ हळूहळू पुन्हा रस्ते रिकामे होऊ लागले. (Pune Citizens Crowd Purchasing Shopping Mob after Lockdown)

कोरोनाचा प्रादुर्भाव रोखण्यासाठी शहरात व्यवहारांवर महापालिकेकडून निर्बंध आणण्यात आले होते. सकाळी सात ते अकरा या वेळेत ठरावीक दुकानांना परवानगी देण्यात आली होती. त्यामुळे शहरात थोडीफार वर्दळ होती. परंतु मंगळवारपासून शहरातील सर्वच दुकाने उघडण्यास महापालिकेने परवानगी दिली आणि गेल्या दोन महिन्यांपासून घरात कोंडलेला श्‍वास मोकळा करण्यासाठी शहरातील सर्वच नागरिक रस्त्यावर उतरली. त्यामुळे सकाळापासून रस्त्यांवर वाहनांची गर्दी होऊ लागली. एरवी सकाळी दहानंतर उघडणारी दुकाने आज सकाळी सात साडेसातच्या सुमारास खुली झाली होती.

दहानंतर तर शहरातील अनेक रस्त्यांवर वाहतुकीची कोंडी झाली होती.जणू या शहरात कोरोनाचा नावाची महामारी कधी आलीच नव्हती, असे चित्र होते. भवानी पेठेतील बाजाराचा परिसर, रविवार पेठेतील बोहरी आळी आणि परिसर, तुळशीबाग, मंडईसह, बाजीराव रस्ता, शिवाजी रस्ता, टिळक रस्ता, फर्ग्युसन रस्ता, जंगली महाराज रस्ता, गणेशखिंड, सिंहगड रस्ता, वारजे-कर्वेनगर, हडपसर अशा सर्वच भागात खरेदीसाठी गर्दी उसळली होती. शहराबरोबरच उपनगरातही हेच चित्र होते. महापालिकेकडून शहराच्या अनेक भागात रस्त्यांची कामे हाती घेण्यात आली आहेत. ही कामे अद्याप अर्धवट आहेत. त्याचा फटका वाहतुकीला बसला. त्यातून शहराच्या मध्यवर्ती भागात वाहतुकीची कोंडी झाली होती.दुपारी दोनपर्यंत शहरातील सर्वच भागात हे चित्र होते. दोन नंतर मात्र दुकाने बंद होऊ लागली. तशी रस्त्यावरील वर्दळ कमी झाली.