पुणे : भांडणकरून माहेरी गेलेल्या पत्नीला आणायला गेलेल्या जावयाचा चाकू भोसकून खून करणाऱ्या सासऱ्याला न्यायालयाने जन्मठेप आणि २५ हजार रुपये दंडाची शिक्षा सुनावली. जिल्हा आणि सत्र न्यायाधीश एस. एच. ग्वालानी यांनी हा निकाल दिला.
सुनील नारायण वाघमारे (वय ४९, रा. बिबवेवाडी) असे शिक्षा सुनावलेल्या सास-याचे नाव आहे. संजय प्रेमानंद देढे (वय २७, रा. आंबेडकरनगर, मार्केट यार्ड) असे खून झालेल्याचे नाव आहे. खुनाच्या घटनेत जखमी झालेला संजय यांचा मित्र नीतेश दीपक कांबळे (वय २४, रा. आंबेडकरनगर, मार्केट यार्ड) यांनी याबाबत बिबवेवाडी पोलिसांत फिर्याद दिली होती. या खटल्याचे कामकाज अतिरिक्त सरकारी वकील विलास घोगरे पाटील यांनी पाहिले. त्यांनी 12 साक्षीदार तपासले. त्यांना न्यायालयीन कामकाजासाठी पैरवी अधिकारी पोलिस हवालदार संजय पुणेकर यांनी मदत केली.
२३ एप्रिल २०१५ रोजी रात्री दहाच्या सुमारास बिबवेवाडी येथील संघर्ष मित्र मंडळ चौक येथे ही घटना घडली होती. संजय हे मित्र नितेशसह पत्नीला आणण्यासाठी घटनेच्या दिवशी रात्री सासुरवाडीला गेले होते. त्यावेळी झालेल्या वादातून सुनील याने चाकूने संजय याच्या पोटात, छातीवर ठिकठिकाणी वार करून त्याचा खून केला. तसेच फिर्यादींना मांडीवर चाकूने वार करून जीवे ठार मारण्याचा प्रयत्न केल्याचे फिर्यादीत म्हटले आहे.
पोलिसांनी सुनीलसह त्याची पत्नी लक्ष्मीबाई, मेहुणा शिवम आणि संजय यांची पत्नी नेहा हिच्यावर गुन्हा दाखल केला होता. मात्र, न्यायालयाने सासरा सुनील याला खुनाच्या कलमानुसार जन्मठेप आणि जीवे ठार मारण्याचा प्रयत्नाच्या कलमानुसार पाच वर्षे सक्तमजुरीची शिक्षा सुनावली. दोन्ही शिक्षा एकत्रित भोगायच्या आहेत. दंड न भरल्यास तीन महिने अतिरिक्त कारावास भोगावा लागणार आहे.
शिळा भात खायला दिला म्हणून झाले भांडण :
संजय आणि नेहा यांचा प्रेमविवाह झाला होता. लग्नानंतर त्यांच्यात विविध कारणांवरून वाद होत. खुनाच्या घटनेच्या काही दिवस आधी संजय हे दुपारी जेवायला घरी आले होते. तेव्हा रात्रीचा शिळा भात खायला दिल्याने संजय चिडले होते. या कारणाने झालेल्या भांडणावरून नेहा माहेरी गेली होती.
- पुण्याच्या बातम्या वाचण्यासाठी येथे ► क्लिक करा
(Edited by: Ashish N. Kadam)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.