Pune Crime - 27 –चोरीचे 11 गुन्हे दाखल असलेला व आठ महिन्यापासून फरार असलेल्या आरोपीला गुन्हे शाखा युनिट सहाने जेरबंद केले. त्याच्यावर विविध पोलीस ठाण्यात गुन्हे दाखल आहेत.ओंकार राजेश मोरे ( वय 19, रा. स. न.14, रामनगर, येरवडा, पुणे ) असे अटक केलेल्या आरोपीचे नाव आहे.

गुन्हे शाखा युनिट सहाचे अधिकारी व अंमलदार हे पेट्रोलिंग करीत असताना रमेश मेमाणे व ऋषीकेश ताकवणे यांना त्यांचे गुप्त बातमीदारा कडून माहिती मिळाली की, वाहन चोरी करणारा व वाहनातून बॅटरी चोरी करणारा ओंकार चोखीधानी रोड येथे थांबलेला आहे. तेथे जाऊन युनिट सहाने त्याला ताब्यात घेतले.

त्याने त्याचा साथिदार शुभम जांभूळकर याच्या मदतीने वाहन चोरीचे चार गुन्हे व वाहनातील बॅटरी चोरीचे सात गुन्हे असे एकूण 11 गुन्हे केले असल्याची कबुली दिली. पोलीस उपनिरीक्षक भैरवनाथ शेळके, मच्छिंद्र वाळके, रमेश मेमाणे, विठ्ठल खेडकर, प्रमोद मोहिते, ऋषीकेश ताकवणे, ऋषीकेश व्यवहारे, सचिन पवार यांनी ही कामगिरी केली.