पुणे - पोलिसांनी तळजाई वसाहतीमध्ये दहशत माजविणाऱ्या सराईत गुन्हेगार मयूर आरडे याच्यासह टोळीतील दहा साथीदारांविरुद्ध महाराष्ट्र संघटित गुन्हेगारी नियंत्रण (मोका) कायद्यांतर्गत कारवाई केली आहे. पोलिस आयुक्त रितेश कुमार यांच्या आदेशानुसार ही कारवाई करण्यात आली.

टोळीप्रमुख मयूर रंगनाथ आरडे (वय २२), हृषिकेश ऊर्फ बारक्या संजय लोंढे (वय २३), रोहन राजू आरडे (वय २१), आदित्य पद्माकर डाकले (वय २०), आकाश मनोज डाकले (वय २३), अनिकेत रवींद्र शिंदे (वय २४), ऋषभ शंकर कांबळे (वय २३), जयेश दत्ता ढावरे (वय १९, सर्व रा. पद्मावती, तळजाई वसाहत) अशी अटक केलेल्यांची नावे आहेत. तर दोन अल्पवयीन मुलांना ताब्यात घेतले आहे.

मयूर आरडे टोळीविरुद्ध गंभीर दुखापत, मालमत्तेचे नुकसान, नागरिकांमध्ये दहशत माजविणे, प्राणघातक शस्त्र बाळगणे असे गंभीर स्वरूपाचे गुन्हे दाखल आहेत.

सहकारनगरचे वरिष्ठ पोलिस निरीक्षक सुरेंद्र माळाळे आणि पोलिस निरीक्षक संदीप देशमाने यांनी या टोळीवर मोका कारवाई करण्याचा प्रस्ताव पोलिस उपायुक्त स्मार्तना पाटील यांच्यामार्फत पाठवला.

अतिरिक्त पोलिस आयुक्त प्रवीणकुमार पाटील यांनी या प्रस्तावाची पडताळणी करून मोका कारवाईस मान्यता दिली. पुढील तपास सहायक पोलिस आयुक्त नारायण शिरगांवकर करीत आहेत.